পূৰ্বে দুৰ্নীতিপৰায়ণ আখ্যা দিয়া কংগ্ৰেছী নেতাকে এতিয়া বিজেপিয়ে আথে-বেথে দলৰ মজিয়াত ঠাই দিয়া দেখি দলটোৰ এগৰাকী নেত্ৰী মীৰা বৰঠাকুৰে নিজৰ হতাশা প্ৰকাশৰ পিছত একেই ক্ষোভ-হতাশা প্ৰকাশ কৰিছে দলটোৰ প্ৰাক্তন সাংসদ আৰ পি শৰ্মাই।
তেজপুৰ লোকসভা সমষ্টিৰ প্ৰাক্তন সাংসদ তথা পুৰণিচাম বিজেপিৰ এজন গুৰুত্বপূৰ্ণ নেতা ৰাম প্ৰসাদ শৰ্মাই হতাশ হৈ দলটো ত্যাগ কৰাৰো ‘চূড়ান্ত সিদ্ধান্ত’ লৈছে।
অহা ১৭ আগষ্টত তেওঁ দলটোৰ পৰা ওলাই অহাটো খাটাং, জনালে নৰ্থ-ইষ্ট নাওক।
শৰ্মাই যোৱা লোকসভা নিৰ্বাচনত এজন প্ৰাক্তন কংগ্ৰেছী তথা ন-বিজেপিৰ হাতত নিজৰ সমষ্টি এৰি দিব লগীয়া হৈছিল।
“এতিয়া জ্যেষ্ঠ বিজেপি নেতাই দলত পাত্তা নাপায়, এইবোৰত লাগি থাকি লাভ নাই। ১৭ আগষ্টত ফাইনেলি বিজেপি ত্যাগ কৰিম, একদম নাথাকো। আগতে পদত্যাগ কৰিছিলো যদিও কেন্দ্ৰই গ্ৰহণ নকৰিলে, এতিয়া আৰু থাকিব নোৱাৰো।” নৰ্থ-ইষ্ট নাওৰ আগত শৰ্মাৰ মন্তব্য।
মীৰা বৰঠাকুৰৰ দৰেই শৰ্মাৰ মতেও বিজেপিৰ এতিয়া কোনো “আদৰ্শ” নাই। তেওঁ ক’লে, তেওঁ এইবিলাক নেতাৰ লগত কাম কৰিব নোৱাৰে।
“আৰ এছ এছ-বিজেপি ৪০ বছৰ কৰিলো, এতিয়া এক ছেকেণ্ডো বিজেপিত থাকিব নোৱাৰো। এতিয়া বিজেপিৰে মোৰ কোনো মতলব নাই, যি য’ত যায় যাওক, যি কৰে কৰক”, যথেষ্ট ক্ষোভত কয় জ্যেষ্ঠ নেতাজনে।
তেওঁলোকে বহু কষ্ট কৰি গঢ় দিয়া বিজেপিক ‘বেদখলকাৰী’য়ে গ্ৰাস কৰা বুলিও দাবী কৰে শৰ্মাই।
‘আমি বহু শ্ৰম কৰি, অসম ঘূৰি ডাঙৰ অট্টালিকা বনাই দিলো, এতিয়া অবৈধ বেদখলকাৰীয়ে যদি আমি বনোৱা ঘৰটো লৈ লয় লওক। আমাৰ কোনো আপত্তি নাই। ভালকৈ কাম কৰক, আমি নতুন “ঘৰ” বিচাৰিম”, শৰ্মাৰ মন্তব্য।
অৱশ্যে, অহা ২০ আগষ্টত নতুন ঘৰৰ ঠিকনাটো ঘোষণা কৰিব বুলি শৰ্মাই কয় যদিও ‘নতুন ঘৰ’ৰ ঠিকনাটো প্ৰকাশ কৰাৰ পৰা বিৰত থাকিল।
আৰ পি শৰ্মাৰ মতে বিজেপিত এতিয়া হিমন্ত যুগ আৰম্ভ হৈছে।
“বিজেপি এতিয়া কংগ্ৰেছৰ মানুহে চলাই আছে। হিমন্ত-যুগ আৰম্ভ হৈছে দলটোত” হিমন্তক কটাক্ষ কৰি শৰ্মাৰ মন্তব্য।
