চৰাইদেউ জিলাৰ বৰহাট আৰক্ষী থানাৰ অন্তৰ্গত মিছাজান গাঁৱৰ নিবাসী তথা বৰহাট নগৰৰ ব্যৱসায়ী বিজিত দে’ক সন্দেহযুক্ত আলফাই ধন দাবী কৰা ঘটনাৰ সৈতে জড়িত দুজন লোকক আজি চৰাইদেউ আৰক্ষীয়ে আটক কৰিবলৈ সক্ষম হয়।
উল্লেখ্যযোগ্য যে চৰাইদেউ জিলাৰ বৰহাট থানাৰ অন্তৰ্গত মিছাজান অঞ্চলৰ ব্যৱসায়ী বিজিত দেক ৯৬৭৮৭৬৯৮০৫ নম্বৰ ম’বাইলৰ পৰা আলফা স্বাধীনৰ নেতা গণেশ অসম বুলি চিনাকি দি মেছেজ যোগে যোৱা ২৭ জুলাইত ধনদাবী কৰিছিল।
পিছত পুনৰ ১০ আগষ্টত ম’বাইলত মেছেজৰ জৰিয়তে পাঁচ দিনৰ ভিতৰত দুই লাখ টকা দিবলৈ দাবী জনায়। অন্যথা বিহিত ব্যৱস্থা লোৱা হ’ব বুলি মেচেজ যোগে ভাবুকি দিয়ে।
এই সন্দৰ্ভত ব্যৱসায়ী বিজিত দে’য়ে বৰহাট আৰক্ষী থানাত ১৬ আগষ্টত এজাহাৰ দাখিল কৰে। এই এজাহাৰৰ ভিত্তিতে চৰাইদেউ জিলা আৰক্ষীয়ে তদন্ত আৰম্ভ কৰি এক অভিযান চলাই দুজনকৈ লোকক আটক কৰিবলৈ সক্ষম হয়।
চৰাইদেউ জিলাৰ অতিৰিক্ত আৰক্ষী অধীক্ষক মৃণাল ডেকাৰ নেতৃত্বত যোৱা আৰক্ষীৰ দলটোৱে আটক কৰিবলৈ সক্ষম হোৱা লোক দুজনক বিতুপন বৰুৱা (৪০) আৰু অৰূপ চেতিয়া (৩১) বুলি চিনাক্ত কৰিছে।
আটকাধীন বিতুপন বৰুৱাই ২০০৯ চনত নিষিদ্ধ ঘোষিত সংগঠন আলফাৰ পৰা আত্ম-সমৰ্পণ কৰিছিল। বিতুপনৰ ঘৰ বৰহাট চাংমাই গাঁৱত। ইফালে আটকাধীন আনজন অৰূপ চেতিয়াৰ ঘৰ সোণাৰিৰ চফ্ৰাই ৰঙাপথাৰত।
বৰ্তমান ধনদাবীৰ ঘটনাৰ সন্দৰ্ভত অধিক তথ্যৰ বাবে সোণাৰি আৰক্ষীয়ে আটকাধীন দুয়োজন লোকক জেৰা অব্যাহত ৰাখিছে বুলি আৰক্ষীৰ সূত্ৰৰ পৰা জানিব পৰা গৈছে।
