বিজেপিলৈ গমনৰ পিছতে প্ৰায় প্ৰতিজন প্ৰাক্তন কংগ্ৰেছী তথা নিজৰ একালৰ সতীৰ্থক গগৈয়ে দুৰ্নীতিগ্ৰস্ত কোৱাটো এটা অভ্যাসত পৰিণত হৈছে।
গেৰুৱা হোৱাৰ পিছতে হিমন্ত বিশ্ব শৰ্মা, ভুৱনেশ্বৰ কলিতা, গৌতম ৰয় আদি দুৰ্নীতিগ্ৰস্ত আছিল বুলি গগৈয়ে সংবাদ মাধ্যমৰ আগত দাবী কৰি আহিছে, যিটো নেতাকেইজন কংগ্ৰেছত থকালৈকে কেতিয়াও কোৱা নাছিল।
ৰাজনৈতিক বিশ্লেষকৰ মতে, গেৰুৱা হোৱাৰ লগে লগে প্ৰাক্তন সতীৰ্থসকলৰ অমুক দুৰ্নীতি, তমুক দুৰ্নীতিত লিপ্ত আছিল বুলি ক’বলৈ গৈ প্ৰাক্তন মুখ্য মন্ত্ৰী গগৈয়ে আওপকীয়াকৈ নিজৰ আমোলত যে প্ৰচুৰ দুৰ্নীতি হৈছিল এই কথাই স্বীকাৰ কৰিছে।
কেৱল সেয়ে নহয়, তেওঁ যে এই কংগ্ৰেছী নেতাসকলে কৰা দুৰ্নীতিৰ বিষয়ে সম্পূৰ্ণ জ্ঞাত আছিল সেয়াও স্পষ্ট হয়।
শেহতীয়া কেইবাখনো সংবাদমেলত গগৈৰ এসময়ৰ সোঁহাত স্বৰূপ হিমন্ত বিশ্ব শৰ্মাক সাৰদা আৰু লুই বাৰ্জাৰ কেলেংকাৰিকে ধৰি অন্য বহু কেইটা কেলেংকাৰিত জড়িত বুলি মন্তব্য কৰি আহিছে।
আজি নিউ মিনিষ্টাৰ কলনিত সম্বোধন কৰা সংবাদমেলত ন-বিজেপি গৌতম ৰয় আৰু ভুৱনেশ্বৰ কলিতাও বিভিন্ন কেলেংকাৰিত জড়িত আছিল বুলি মন্তব্য কৰে প্ৰাক্তন মুখ্য মন্ত্ৰী গগৈয়ে।
“ভুৱনেশ্বৰ কলিতাৰ বিৰুদ্ধে কমনৱেলথ গেমছ কেলেংকাৰিৰ তদন্ত হৈছিল। জড়িত আছিল নে নাই মই নাজানো, কিন্তু তেওঁ অভিযুক্ত আছিল”, সংবাদমেলত গগৈৰ মন্তব্য।
ইপিনে, কংগ্ৰেছৰ আমোলত মন্ত্ৰী হৈ থকা গৌতম ৰয়ো সমাজ কল্যাণ বিভাগৰ কেলেংকাৰিৰ সৈতে জড়িত থকা বুলি গগৈয়ে আওপকীয়াকৈ স্বীকাৰ কৰে।
“গৌতম ৰয়ৰ বিৰুদ্ধে সমাজ কল্যাণ বিভাগৰ কেলেংকাৰিৰ তদন্ত কৰিছিল। তেওঁক জেৰাও কৰিছিল। কিন্তু এতিয়া আমাক লাগে তদন্তত চৰকাৰে কি পালে? তেওঁক এতিয়া নিৰ্দোষী বুলি চাৰ্টিফিকেট দিলে নেকি?” গগৈৰ প্ৰশ্ন।
তেওঁ এ পি এছ চি কেলেংকাৰিৰ মূল নায়ক বুলিও গৌতম ৰয়ক চিহ্নিত কৰে।
“গৌতম ৰয় গ্ৰেপ্তাৰ হোৱাৰ ভয়তে বিজেপিলৈ যোৱা বুলি মানুহে কয়” বুলি উল্লেখ কৰি গগৈৰ প্ৰশ্ন,- “নহ’লে কি কাৰণত তেওঁ বিজেপিলৈ যাব?”
