অসম চুক্তিৰ ৬ নং দফা ৰূপায়ণৰ মূল খোজ বুলিব পৰা “খিলঞ্জীয়াৰ ৰক্ষাকৱচ”ৰ উপায় নিৰ্ধাৰণৰ বাবে কেন্দ্ৰীয় চৰকাৰে গঠন কৰি দিয়া উচ্চ স্তৰীয় কমিটীৰ আজি তৃতীয়খন বৈঠক অনুষ্ঠিত হয়।
বৈঠকত “খিলঞ্জীয়াৰ ৰক্ষাকৱচ” সন্দৰ্ভত অসমৰ ৰাইজৰ মতামত লোৱাৰ সিদ্ধান্ত কৰা হয় বুলি জনালে উপস্থিত থকা আছুৰ নেতৃবৃন্দই।
“খিলঞ্জীয়াৰ সুৰক্ষাকবচ সন্দৰ্ভত অসমৰ বিভিন্ন জাতীয়, জনগোষ্ঠীয় সংগঠন, বিশিষ্ট নাগৰিক আৰু সৰ্বসাধাৰণ ৰাইজৰ দিহা-পৰামৰ্শ লৈ আগুৱাই যাবলৈ সিদ্ধান্ত গ্ৰহণ কৰা হৈছে”, বৈঠকত উপস্থিত থকা আছুৰ উপদেষ্টা সমুজ্জ্বল ভট্টাচাৰ্য্যৰ সংবাদ মাধ্যমৰ আগত মন্তব্য।
উচ্চ ন্যায়ালয়ৰ প্ৰাক্তন ন্যায়াধীশ বিপ্লৱ কুমাৰ শৰ্মাৰ নেতৃত্বত গঠিত হোৱা ১৪জনীয়া কমিটীখনৰ এই তৃতীয় বৈঠক।
বৈঠক অনুষ্ঠিত হয় মহানগৰীৰ অসম প্ৰশাসনীয় পদাধিকাৰী প্ৰশিক্ষণ মহাবিদ্যালত। একে স্থানতে কালি দ্বিতীয়খন বৈঠক অনুষ্ঠিত হৈছিল আৰু কিছু আলোচনা আধৰুৱা হৈ থকা বাবে আজি পুনৰ বহে কমিটীৰ বিষয়ববীয়াসকল। প্ৰথমখন বৈঠক দিল্লীত অনুষ্ঠিত হৈছিল।
পৰামৰ্শৰ বাবে বিশিষ্ট ব্যক্তিকো সাক্ষাৎ কৰা হ’ব বুলি ভট্টাচাৰ্য্যই জানিবলৈ দিয়ে।
যোৱা ১৩ জুলাইত গঠন কৰা কমিটীখনে ইয়াৰ প্ৰতিবেদন দাখিল কৰাৰ বাবে হাতত ছমাহৰ সময় পাইছে।
সমুজ্জ্বল ভট্টাচাৰ্য্যই সংবাদ মাধ্যমক জনোৱামতে, ৰাইজে নিৰ্দিষ্ট ই-মেইলত, লিখিত ৰূপত কমিটিখনৰ হাতত তেওঁলোকৰ পৰামৰ্শসমূহ জনাব পাৰিব আৰু তাৰ বাবে অলপতে ইমেইল প্ৰকাশ কৰা হ’ব।
কমিটীৰ প্ৰতিবেদন পোৱাৰ পিছত কেন্দ্ৰীয় গৃহ মন্ত্ৰ্যালয়য়ে তাৰ আধাৰত অসম চুক্তিৰ ৬ নং দফা কাৰ্যকৰীকৰণ সন্দৰ্ভত পৰৱৰ্তী পদক্ষেপ ল’ব, এই প্ৰতিশ্ৰুতি কেন্দ্ৰীয় চৰকাৰৰ।
এই উদ্দেশ্যে গঠিত পূৰ্বৰ কমিটীখন বেছিভাগ সদস্যই পদত্যাগ কৰাৰ ফলত ভংগ হৈ যোৱাত চৰকাৰে নতুন কমিটীখন গঠন কৰে।
কমিটীখনত প্ৰাক্তন ন্যায়াধীশ বিপ্লৱ কুমাৰ শৰ্মাৰ উপৰি অসমৰ মহাধিবক্তা ৰমেশ বৰপাত্ৰগোহাঞি, অৰুণাচল প্ৰদেশৰ মহাধিবক্তা নিলয় দত্ত, অৱসৰপ্ৰাপ্ত আই এ এছ বিষয়া সুভাষ দাস, অসম আৰক্ষী (বিশেষ শাখা)ৰ প্ৰাক্তন সঞ্চালক প্ৰধান পল্লৱ ভট্টাচাৰ্য্য, অৱসৰপ্ৰাপ্ত অধ্যাপক সৃষ্টিধৰ দত্ত, লেখক সুমন্ত চলিহা, অধ্যাপক জয়কান্ত শৰ্মা, জ্যেষ্ঠ সাংবাদিক ৱাছবিৰ হুছেইন আৰু সদৌ অসম ছাত্ৰ সন্থাৰ মুখ্য উপদেষ্টা, সভাপতি আৰু সম্পাদক ক্ৰমে ড০ সমুজ্জ্বল কুমাৰ ভট্টাচাৰ্য্য, দীপাংক কুমাৰ নাথ আৰু লুৰিণজ্যোতি গগৈও সদস্য হিচাপে সমিতিখনত আছে।
কমিটীখনত খিলঞ্জীয়া লোকক সদস্য হিচাপে নোলোৱাক লৈ আজি এজন লোকে ইয়াৰ আঁৰত থকা কাৰণ সম্পৰ্কে প্ৰশ্ন কৰে।
অহা ৬ ছেপ্টেম্বৰত কমিটীখনৰ পৰৱৰ্তী বৈঠক অনুষ্ঠিত হ’ব।
উল্লেখযোগ্য যে কাশ্মীৰী লোকৰ ৰক্ষা কৱচস্বৰূপ ৩৭০ অনুচ্ছেদ সংবিধানৰ পৰা আঁতৰ কৰাৰ পিছত অসমবাসীক “খিলঞ্জীয়াৰ ৰক্ষাকৱচ” দিয়াৰ প্ৰক্ৰিয়াই কি পৰ্য্যায়লৈকে যাব পাৰে সি লক্ষণীয় হ’ব।