কেন্দ্ৰীয় গৃহ মন্ত্ৰী অমিত শ্বাহে আজি মুখ্য মন্ত্ৰী সৰ্বানন্দ সোণোৱালৰ উপস্থিতিত নতুন দিল্লীৰ দ্বাৰকাত কাৰ্বি ভৱন আৰু ডিমাছা ভৱনৰ আধাৰশিলা স্থাপন কৰে।
কাৰ্বি আংলং স্বীয়ত্ত শাসিত পৰিষদ আৰু উত্তৰ কাছাৰ পাৰ্বত্য স্বায়ত্ত শাসিত পৰিষদৰ উদ্যোগত এই ভৱন নিৰ্মাণৰ পদক্ষেপ লোৱা হৈছে।
আধাৰশিলা স্থাপন অনুষ্ঠানত মুখ্য অতিথি হিচাপে ভাষণ প্ৰদান কৰি গৃহ মন্ত্ৰী গৰাকীয়ে কয় যে বৰ্তমানৰ চৰকাৰৰ লক্ষ্য হৈছে উত্তৰ-পূবৰ সৰ্বাংগীন উন্নয়ন সাধন কৰা।
অসম এতিয়া সৰ্বাংগীন বিকাশৰ দিশত আগুৱাই গৈছে বুলি উল্লেখ কৰি শ্বাহে লগতে কয় যে ৰাজ্যখনৰ প্ৰতিটো জাতি-জনগোষ্ঠীক সম-উন্নয়ন আৰু সম-মৰ্যাদা প্ৰদান কৰি আগুৱাই লৈ যোৱাৰ বাবে কেন্দ্ৰীয় চৰকাৰ বদ্ধপৰিকৰ।
সভাত ভাষণ প্ৰদান কৰি মুখ্য মন্ত্ৰী সৰ্বানন্দ সোণোৱালে কয় যে নতুন দিল্লীত কাৰ্বি ভৱন আৰু ডিমাছা ভৱন নিৰ্মাণৰ বাবে গ্ৰহণ কৰা পদক্ষেপৰ ফলশ্ৰুতিত কাৰ্বি আংলং, পশ্চিম কাৰ্বি আংলং আৰু ডিমা হাছাও জিলা তিনিখনৰ জনাসাধাৰণৰ লগতে সামগ্ৰিকভাৱে অসমৰ জনসাধাৰণ উপকৃত হ’ব।
আজি এই ভৱন দুটাৰ আধাৰশিলা স্থাপন কৰাৰ বাবে অমিত শ্বাহৰ লগতে এইক্ষেত্ৰত পদক্ষেপ গ্ৰহণ কৰা ডিমা হাছাও আৰু কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য ক্ৰমে দেৱলাল গাৰ্লোচা আৰু তুলিৰাম ৰংহাঙক ধন্যবাদ জনায়।
কেন্দ্ৰীয় ড’নাৰ মন্ত্ৰী ড০ জিতেন্দ্ৰ সিং আৰু মন্ত্ৰী হিমন্ত বিশ্ব শৰ্মাই ভাষণ দিয়া আজিৰ এই আধাৰশিলা স্থাপন অনুষ্ঠানত কেন্দ্ৰীয় খাদ্য সংসাধন দপ্তৰৰ ৰাজ্যিক মন্ত্ৰী ৰামেশ্বৰ তেলী, অসম চৰকাৰৰ পাৰ্বত্য অঞ্চল উন্নয়ন বিভাগৰ মন্ত্ৰী চুম ৰংহাং, স্বায়ত্ত শাসিত পৰিষদ দুটাৰ মুখ্য কাৰ্যবাহী সদস্যকে বহু কেইগৰাকী সাংসদ, বিধায়ক উপস্থিত থাকে।
