ৰাজ্য চৰকাৰৰ বিত্ত মন্ত্ৰী হিমন্ত বিশ্ব শৰ্মাৰ বিৰুদ্ধে আদালত অৱমাননাৰ গোচৰ তৰিব কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে।
সংবাদ মাধ্যমক এই কথা জানিবলৈ দিয়ে কৃষক নেতাগৰাকীয়ে।
অখিলে কয় যে তেওঁ আমাৰ বিৰুদ্ধে যি অভিযোগ আনিছিল, তাক প্ৰমাণ কৰিব নোৱাৰিলে। এতিয়া তেওঁ আদালতক অৱমাননা কৰি চালে বেৰে কোবোৱা কথা কৈছে।
‘’গুৱাহাটীৰ চেছন আদালতৰ প্ৰতি বিনম্ৰ আহ্বান যে আদালত অৱমাননা কৰাৰ গোচৰত মন্ত্ৰী হিমন্ত বিশ্ব শৰ্মাক গ্ৰেপ্তাৰ কৰিব লাগে। আদালতে নিজাববীয়াকৈ এই গোচৰ ল’ব লাগে। আদালতৰ এই বিষয় দৃষ্টিগোচৰ নহ’লে হিমন্তৰ বিৰুদ্ধে আদালত অৱমাননা গোচৰ দিম,’’- গগৈয়ে সংবাদমাধ্যমৰ আগত কয়।
উল্লেখযোগ্য যে, ২০১০ চনতে অৰ্থ্যাৎ ৯ বছৰ পূৰ্বে অখিল গগৈৰ বিৰুদ্ধে গুৱাহাটী উচ্চ ন্যায়ালয়ত গোচৰ তৰিছিল হিমন্ত বিশ্ব শৰ্মাই। লগতে মন্ত্ৰী হিমন্ত বিশ্ব শৰ্মাই তৰা এই গোচৰত দোষী সাব্যস্ত হৈ কাৰাদণ্ডৰ সন্মুখীন হৈছিল ছেণ্টিনেল কাকতৰ প্ৰাক্তন সাংবাদিক বিকাশ শৰ্মা।
ইপিনে, ‘তদন্তকাৰী সংস্থাটোৱে স্পষ্ট তথ্য পাইছে যে উত্তৰ-কাছাৰ পাৰ্বত্য জিলাৰ কেলেংকাৰিৰ মূল অভিযুক্ত আৰ এইচ খানে তেওঁ কিনা বিলাসী বাহনসমূহ স্বাস্থ্য আৰু পৰিয়াল কল্যাণ মন্ত্ৰী হিমন্ত বিশ্ব শৰ্মাক উপহাৰ হিচাপে প্ৰদান কৰিছে।” এই বাতৰি প্ৰকাশ পোৱাৰ পাছত হিমন্তই আদালতত গোচৰ তৰাত এই মন্তব্য কৰা নাই বুলি আদালতত সাক্ষ্য দিছিল।
ইয়াৰ পাছতে বৃহস্পতিবাৰে মন্ত্ৰী হিমন্ত বিশ্ব শৰ্মাই গুৱাহাটী চেছন আদালতত এই গোচৰৰ সাক্ষ্য দান কৰি সংবাদ মাধ্যমৰ আগত কয়, ‘’অখিল গগৈয়ে সংবাদমেলত কোৱা কথা আদালতত অস্বীকাৰ কৰি বিপদত পেলাইছে সংবাদ পত্ৰক। অখিলৰ এনে কাণ্ডই জে’ল খুৱাইছে বাতৰি কাকতৰ সম্পাদকক।‘’
আনহাতে, হিমন্ত বিশ্ব শৰ্মাৰ এই মন্তব্যৰ পাছতে সৰব হৈ পৰিছে কৃষক নেতাগৰাকী।
গগৈয়ে কয়, ‘’হিমন্ত বিশ্ব শৰ্মাই মানহানিৰ গোচৰ দিছিল যদিও তাৰ যথোপযুক্ত প্ৰমাণ দিব নোৱাৰাত আদালতে আমাক নিৰ্দোষী বুলি ক’লে। অৰ্থাৎ আদালতৰ ওচৰত আমি জিকিলো। হিমন্ত বিশ্ব শৰ্মা মোৰ লগত হাৰিছে। তেওঁ হৰাৰ পাছত আবোল তাবোল বকি মিছা কথা কৈ সংবাদ মাধ্যমৰ লগত মোৰ সংঘাত লগাবৰ বাবে চেষ্টা কৰিছে।‘’
তদুপৰি, ‘’হিমন্ত বিশ্ব শৰ্মাৰ বিৰুদ্ধে আমাৰ মুখ কেতিয়াও বন্ধ নহয়। দুৰ্নীতিপৰায়ণ মানুহক দুৰ্নীতিপৰায়ণ বুলি কোৱাৰ সাহস আমাৰ আছিল আৰু বৰ্তমানো আছে,’’ এই মন্তব্য কৃষক নেতাগৰাকীৰ।
অখিল গগৈয়ে লগতে কয়, ‘’হিমন্ত বিশ্ব শৰ্মা অতি দুৰ্নীতিগ্ৰস্ত মানুহ আছিল। অসমৰ সকলোবোৰ দুৰ্নীতিগ্ৰস্ত কামৰ তালিকাত হিমন্ত বিশ্ব শৰ্মাৰ নাম সাঙোৰ খাই আছে। সাৰদা, লুই বাৰ্জাৰ কেলেংকাৰি, উত্তৰ কাছাৰৰ কেলেংকাৰিত প্ৰত্যেকতে তেওঁৰ নাম জড়িত হৈ আছে।‘’
