শেহতীয়া ঈদত কুৰবানিৰ চাহিদা পূৰণৰ বাবে বজাৰলৈ অনা এটা উটে দৰং আৰক্ষীৰ জিম্মাত মঙলবাৰে প্ৰাণ হেৰুৱাইছে।
দৰং আৰক্ষীৰ জিম্মাধীন বাকী ছটা উটৰ পাঁচটা বৰ্তমান আছে আদালতৰ নিৰ্দেশৰ প্ৰতীক্ষাত।
উটকেইটাক সিহঁতৰ ৰাজস্থানৰ ঘৰলৈ ওভতাই নিয়াক লৈ আদালতে এতিয়ালৈকে কোনো নিৰ্দেশ জাৰি কৰা নাই।
ধূলা আৰক্ষীয়ে মঙলদৈৰ সমীপৰ এখন বজাৰৰ পৰা যোৱা ১০ আগষ্টত উটকেইটা জব্দ কৰিছিল।
ধূলা থানাত পাঁচটা উট ৰখাৰ বিপৰীতে সদ্যপ্ৰয়াত উটটো ৰখা হৈছিল মঙলদৈ আৰক্ষীৰ জিম্মাত।
ৰাজস্থান মৰুভূমিৰ সম্পূৰ্ণ বিপৰীত জলবায়ুৰ পৰা অসমলৈ অনা উটকেইটাক জব্দ কৰাৰ দিনাৰে পৰা ৰ’দে-বৰষুণে মুকলি আকাশৰ তলত ৰখা হৈছিল।
উট সম্বন্ধীয় জ্ঞানযুক্ত স্থানীয় পশু চিকিৎসকো উপলব্ধ নাছিল।
“আমাৰ জিম্মাত পোৱাত পলম হোৱা বাবে আৰু সিহঁতক ওভটাই নিয়াৰ কৰ্তৃত্বদায়ী নিৰ্দেশ নোপোৱাৰ বাবেই আজি উটটো মৃত্যুমুখত পৰিল,” নৰ্থইষ্ট নাওক জনায় যোৱা ১৮ আগষ্টত অসমত উপস্থিত হোৱা ৰাজস্থান ৰাজ্যিক পশু কল্যাণ বিষয়া সুজিত চৌধুৰীয়ে।
আদালতে যোৱা ২২ আগষ্টত উটকেইটা চৌধুৰীৰ জিম্মাত চমজোৱাৰ নিৰ্দেশ যদিও নিৰ্দেশটোত ৰাজস্থানলৈ উটকেইটা ওভতাই নিয়াৰ কৰ্তৃত্ব প্ৰদানৰ উল্লেখ অনুপস্থিত আছিল।
ফলত উচ্চতম ন্যায়ালয়ৰ জন্তু সম্পৰ্কীয় নিৰ্দেশনা অনুযায়ী উটকেইটা ওভতাই নিয়াৰ কৰ্তৃত্ব বিচাৰি সোমবাৰে এক নতুন আবেদন কৰিছে বিষয়াজনে।
“উটকেইটা পুনৰ ৰাজস্থানলৈ লৈ যোৱাৰ বাবে যোৱা ১৮ আগষ্টৰ পৰা মই হাবাথুৰি খাই ফুৰিছো,” চৌধুৰীয়ে কয়।
