চাৰি দশক জুৰি চলা নিৰৱছিন্ন আন্দোলন, অপেক্ষা আৰু বহু আশা-প্ৰত্যাশাৰ অন্তত মহামান্য উচ্চতম ন্যায়ালয়ৰ প্ৰত্যক্ষ নিৰীক্ষণত আজি প্ৰকাশ পালে ৰাষ্ট্ৰীয় নাগৰিক পঞ্জীৰ চূড়ান্ত তালিকা।
আজি প্ৰকাশ পোৱা নাগৰিক পঞ্জীক লৈ একাংশই নিজৰ ক্ষোভ ব্যক্ত কৰাৰ বিপৰীতে আন একাংশই এন আৰ চি প্ৰক্ৰিয়াক আদৰণি জনাইছে।
সমান্তৰাল ভাৱে নাগৰিকত্ব আইন সংশোধনী বিৰোধী মঞ্চয়ো আজি প্ৰকাশ পোৱা ৰাষ্ট্ৰীয় নাগৰিক পঞ্জীৰ চূড়ান্ত খচৰাক আদৰণি জনায়। এই কথা মঞ্চই সংবাদমেল যোগে প্ৰকাশ কৰে।
সংবাদমেলত নাগৰিকত্ব আইন সংশোধনী বিৰোধী মঞ্চই এন আৰ চি প্ৰক্ৰিয়াক শলাগ লোৱাৰ লগতে চৰকাৰৰ এন আৰ চি বিৰোধী স্থিতিক সমালোচনা কৰে।
আনহাতে বিশিষ্ট বুদ্ধিজীৱী ড০ হীৰেন গোহাঁইয়েও ৰাষ্ট্ৰীয় নাগৰিক পঞ্জীক আদৰণি জনোৱাৰ লগতে সকলোকে অপপ্ৰচাৰ চলোৱাৰ পৰা বিৰত থাকিবলৈ আহ্বান জনায়।
ইফালে শুকুৰবাৰে এন আৰ চি সন্দৰ্ভত হিমন্ত বিশ্ব শৰ্মাই কৰা মন্তব্যক সমালোচনা কৰি মনজিৎ মহন্তই কয় যে তেওঁলোকৰ বাবে ইছলাম ধৰ্মী মানেই বাংলাদেশী ৷
তাৰোপৰি এন আৰ চিৰ মুখ্য সমন্বয়ক প্ৰতীক হাজেলাৰ লগতে যি সকল বিষয়ববীয়াই সক্ৰিয়তাৰে কাম কৰিলে তেওঁলোককো নাগৰিকত্ব আইন সংশোধনী বিৰোধী মঞ্চই আজি সংবাদমেলৰ জৰিয়তে ধন্যবাদ জ্ঞাপন কৰে।
