নিবনুৱাৰে ভৰি থকা ৰাজ্যখনৰ দহ হাজাৰ যুৱকক চৰকাৰে লঘু যাত্ৰীবাহী বাহন ক্ৰয় কৰাৰ বাবে ৰাজ সাহায্য আগ বঢ়াবলৈ সিদ্ধান্ত কৰিছে।
ৰাজ্যৰ দহ হাজাৰখন গাঁৱৰ দহ হাজাৰজন নিবনুৱা যুৱকলৈ এই সকাহ আগ বঢ়াব বুলি মুখ্য মন্ত্ৰীয়ে যোৱা স্বাধীনতা দিৱসৰ কাৰ্য্যসূচীতে ঘোষণা কৰিছিল। যুৱকসকলে এই বাহন ক্ৰয়ত ২৫ শতাংশ ৰাজসাহায্য পাব।
মুখ্য মন্ত্ৰীয়ে আজি বাজেট সন্নিৱিষ্ট শিক্ষা বিভাগৰ বিভিন্ন ঘোষণা আৰু স্বাধীনতা দিৱসত নিজেই কৰা ঘোষণাৰ ৰূপায়ণৰ পৰ্য্যালোচনা বৈঠক অনুষ্ঠিত কৰিছিল।
অহা ২ অক্টোবৰত এই আঁচনিৰ প্ৰাৰম্ভণ কৰিবলৈ মুখ্য মন্ত্ৰীয়ে ৰাজ্যৰ পৰিবহণ বিভাগক নিৰ্দেশ দিয়া বুলি চৰকাৰৰ বিবৃতিত প্ৰকাশ।
একেদৰে, ৰাজ্যখনৰ ১ হাজাৰজন যুৱ সাহিত্যিকক ৫০ হাজাৰকৈ টকাৰ এককালীন সাহায্য আগ বঢ়োৱা হ’ব বুলি বাজেটত সন্নিৱিষ্ট শিক্ষা বিভাগৰ ঘোষণাটো ৰূপায়ণৰ সূচনা কৰিবলৈ বিভাগটোক নিৰ্দেশ দিয়ে মুখ্য মন্ত্ৰীয়ে। এই ৫০ হাজাৰ টকাৰ এককালীন ৰাজ সাহায্য বিভিন্ন জনগোষ্ঠীয় সাহিত্য সভাসমূহৰ দ্বাৰা নিৰ্বাচিত সাহিত্যিকক আগ বঢ়োৱা হ’ব।
ইয়াৰোপৰি আজিৰ বৈঠকত ১ লাখ পৰিয়ালৰ গৃহত অনাময় শৌচাগাৰ নিৰ্মাণৰ বাবে আৰ্থিক সাহায্য আগ বঢ়োৱা বিষয়টোও আলোচনা হয়। এই সাহায্য আগ বঢ়াওঁতে বান-ক্ষতিগ্ৰস্ত এলেকাৰ পৰিয়ালবোৰক অগ্ৰাধিকাৰ ভিত্তিত সামৰি ল’বলৈ জনস্বাস্থ্য কাৰিকৰী বিভাগক নিৰ্দেশ দিয়ে।
ৰাজ্যৰ সকলো চৰকাৰী আৰু প্ৰাদেশীকৃত উচ্চ আৰু উচ্চতৰ মাধ্যমিক বিদ্যালয়ত ৰানিং ৱাটাৰ, টয়লেট আৰু বিনামূলীয়া চেনিটেৰি নেপকিন ভেণ্ডিং মেচিনৰ সুবিধা থকা গাৰ্লছ কমনৰূম নিৰ্মাণ আদি দিশৰো বিতং আলোচনা হয়। মুখ্য মন্ত্ৰীয়ে অহা ১৫ অক্টোবৰৰ পৰা ৰাজ্যৰ কেইখনমান বিদ্যালয়ত পাইলট প্ৰজেক্ট হিচাপে এই কামৰ শুভাৰম্ভ কৰিবলৈ শিক্ষা বিভাগৰ নিৰ্দেশ দিয়ে।
আজিৰ বৈঠকত মুখ্য মন্ত্ৰীৰ প্ৰধান সচিব সঞ্জয় লোহিয়াৰ উপৰি শিক্ষা বিভাগ, জনস্বাস্থ্য কাৰিকৰী বিভাগৰ সচিব সকল উপস্থিত আছিল।
