৪১,০০০ টে’ট শিক্ষকৰ চাকৰি নিশ্চিত বেতনৰ সুৰক্ষাসহ নিয়মীয়া কৰাৰ দাবীত আন্দোলন কৰি অহা ৰাজ্যৰ প্ৰাথমিক টে’ট উত্তীৰ্ণ শিক্ষকসকল আজি পুনৰ আন্দোলনত বহে।
সদৌ অসম প্ৰাথমিক টে’ট উত্তীৰ্ণ শিক্ষক সমাজৰ আহ্বনত টে’ট উত্তীৰ্ণ ঠিকাভিত্তিক শিক্ষকসকলে মুঠ ১৮৩টা কেন্দ্ৰত অৱস্থান ধৰ্মঘটত বহে।
এটা বিবৃতিত সদৌ অসম প্ৰাথমিক টে’ট উত্তীৰ্ণ শিক্ষক সমাজে কয় যে বৰ্তমানৰ টে’ট শিক্ষসকলৰ চাকৰি নিয়মীয়া নকৰাকৈ আকৌ পাতিবলৈ লোৱা টে’ট পৰীক্ষা মানি নলয়।
শিক্ষা মন্ত্ৰীয়ে শিক্ষকসকলৰ মাজত বিভাজনৰ ৰাজনীতি কৰা বুলিও অভিযোগ আনে সমাজে।
যোৱা ২৯ জুনত গুৱাহাটীৰ খানাপাৰাত প্ৰাথমিক টে’ট উত্তীৰ্ণ শিক্ষকসকল একত্ৰিত হৈ “দিচপুৰ চলো” কাৰ্য্যসূচীৰ জৰিয়তে শিক্ষকসকলৰ চাকৰি বেতন সুৰক্ষাসহ বিনাচৰ্তে নিয়মীয়াকৰণৰ দাবীৰে স্মাৰকপত্ৰ প্ৰদান কৰিছিল, বিবৃতিটোত জনায়।
সদৌ অসম প্ৰাথমিক টে’ট উত্তীৰ্ণ শিক্ষক সমাজৰ সভাপতি আৰু সম্পাদক স্বাক্ষৰিত বিবৃতিটোত আৰু কোৱা হয়- “কিন্তু শিক্ষা মন্ত্ৰীয়ে আন্দোলনকাৰী শিক্ষকসকলক আলোচনালৈ নামাতি কেৱল ২০১২ চনৰ টে’ট শিক্ষকৰ কেইজনমান প্ৰতিনিধিক লৈ আলোচনা কৰে আৰু এখন মাইনুটছ প্ৰকাশ কৰে। কিন্তু মাইনুটছখনত টে’ট শিক্ষকৰ চাকৰি নিয়মীয়াকৰণৰ বিষয়টোৱেই স্থান নাপালে। ফলত পুনৰ শিক্ষকসকল আন্দোলনৰ পথলৈ আহিব লগীয়া হয়।”
আজি প্ৰায় ৩৭,০০০ টে’ট উত্তীৰ্ণ শিক্ষক-শিক্ষয়িত্ৰীয়ে আন্দোলনত অংশগ্ৰহণ কৰে বুলি দাবী বিবৃতিটোৰ।
সদৌ অসম প্ৰাথমিক টে’ট উত্তীৰ্ণ শিক্ষক সমাজে শিক্ষা মন্ত্ৰী আৰু মুখ্য মন্ত্ৰীক আন্দোলনৰত টে’ট শিক্ষক মসাজক শীঘ্ৰেই আলোচনাৰ বাবে মাতিবলৈ দাবী জনায়।
অন্যথা অধিক কঠোৰ আন্দোলন হাতত ল’ব, যাৰ ভিতৰত জিলা প্ৰাথমিক শিক্ষা বিষয়াৰ কাৰ্যালয়ত তলা বন্ধৰ দৰে কাৰ্য্যসূচী থাকিব, বিবৃতিটোত উল্লেখ কৰা হয়।
