স্মাৰ্ট চিটি প্ৰকল্পৰ অধীনত গান্ধী মণ্ডপত ৰূপায়িত সৌন্দৰ্য্য ৱৰ্দ্ধন কাৰ্য্যসূচী শুকুৰবাৰে পৰ্য্যবেক্ষণ কৰে মুখ্য মন্ত্ৰী সৰ্বানন্দ সোণোৱালে।
শুকুৰবাৰে সন্ধিয়া গান্ধী মণ্ডপত উপস্থিত হৈ মুখ্য মন্ত্ৰী সোণোৱালে সমগ্ৰ এলেকাটো পৰিভ্ৰমণ কৰি সৌন্দৰ্য্যৱৰ্দ্ধন কাৰ্য্যসূচীৰ চাক্ষুক অভিজ্ঞতা লোৱাৰ লগতে এলেকাটো অধিক আকৰ্ষণীয় আৰু জ্ঞানৱৰ্দ্ধক কৰি তোলাৰ বাবে গ্ৰহণ কৰিবলগীয়া বিভিন্ন পদক্ষেপ সম্পৰ্কে গুৱাহাটী উন্নয়ন বিভাগ আৰু জিলা প্ৰশাসনৰ বিষয়াসকলৰ লগত আলোচনা কৰে।
আলোচনাকালত সোণোৱালে বাপুজীৰ জীৱন আৰু কৰ্মৰাজিৰ ওপৰত আধাৰিত এখন ফটো প্ৰদৰ্শনীৰ ব্যৱস্থা লোৱাৰ উপৰি শব্দ আৰু সংগীতৰ মাধ্যমেৰে মহাত্মা গৰাকীৰ জীৱন জীৱন্ত কৰি তুলিব পৰা পদক্ষেপ সম্পৰ্কে বিষয়াসকলক অধ্যয়ণ কৰি যাৱতীয় পদক্ষেপ ল’বলৈ নিৰ্দেশ দিয়ে।
গান্ধী মণ্ডপলৈ অহা লোকসকলৰ বাবে ভ্ৰমণটো যাতে জ্ঞানৱৰ্দ্ধক অভিজ্ঞতাত পৰিৱৰ্তিত হয় সেয়া নিশ্চিত কৰিবলৈ যথোচিত পদক্ষেপ ল’বৰ বাবে মুখ্য মন্ত্ৰী সোণোৱালে বিষয়াসকলক কয়।
গান্ধীজীয়ে পৰিষ্কাৰ-পৰিচ্ছন্নতাৰ ওপৰত সৰ্বাধিক গুৰুত্ব আৰোপ কৰা পৰিষ্কাৰ-পৰিচ্ছন্নতাকে ঈশ্বৰ পৰায়ণতা বুলি মন্তব্য কৰিছিল।
সেই কথা উল্লেখ কৰি মুখ্য মন্ত্ৰী সোণোৱালে গান্ধী মণ্ডপস্থলীত পৰিষ্কাৰ-পৰিচ্ছন্নতা বজাই ৰখাৰ বাবে তথা সমগ্ৰ এলেকাটো পোহৰাই ৰাখিবলৈ যাৱতীয় পদক্ষেপ ল’বৰ বাবে বিষয়াসকলক নিৰ্দেশ দিয়ে।
তদুপৰি, নিয়মীয়াকৈ গছ সমূহ কলম কৰা তথা গছ সমূহত অসমীয়া আৰু বৈজ্ঞানিক নাম ফলক আঁৰি দিয়া তথা ঔষধি গছ ৰোপণৰ বাবে পদক্ষেপ ল’বলৈও তেখেতে কয়।
আলোচনা কালত মুখ্য মন্ত্ৰী সোণোৱালে মণ্ডপস্থলীত অবিৰত বিদ্যুত যোগান, শৌচাগাৰ আৰু প্ৰশ্ৰাৱগাৰৰ পৰিষ্কাৰ-পৰিচ্ছন্নতা তথা পৰ্যাপ্ত পানীযোগান নিশ্চিত কৰিবলৈ বিষয়াসকলক নিৰ্দেশ দিয়ে।
