তিনিচুকীয়া জিলাৰ মাৰ্ঘেৰিটাৰ হিলভিউত আজি দুপৰীয়া সংঘটিত হোৱা এক শোকাবহ দুৰ্ঘটনাত এগৰাকী ৬২ বছৰীয়া লোকে প্ৰাণ হেৰুৱা ঘটনাই সমগ্ৰ অঞ্চলটোত শোকৰ ছাঁ পেলাইছে।
জানিব পৰা মতে, গুৱাহাটী-লিডু অভিমুখী ইণ্টাৰচিটি ৰে’লগাড়ীখনে হিলভিউৰ ওচৰত ৰেহেলা বেগম নামৰ এগৰাকী ৬২ বছৰীয়া বয়স্ক লোকক মহটিয়াই নিয়ে।
মাৰ্ঘেৰিটা গেছ এজেঞ্চিত ৰন্ধন গেছৰ চিলিণ্ডাৰ বুক কৰিবলৈ যোৱাৰ সময়ত ৰে’ল পথ অতিক্ৰম কৰি থকা অৱস্থাত গুৱাহাটী-লিডু ইণ্টাৰচিটি এক্সপ্ৰেছ ৰে’লগাড়ীখনে মহিলাগৰাকীক খুন্দা মাৰে আৰু এই দুৰ্ঘটনাৰ ফলত ঘটনাস্থলীতে অতি দৰিদ্ৰ পৰিয়ালৰ মহিলাগৰাকীয়ে মৃত্যুক সাবতি লয়।
আনহাতে, দুৰ্ঘটনা সংঘটিত হোৱাৰ পাছতে দুৰ্ঘটনাস্থলীত আৰক্ষীৰ দল উপস্থিত হয় আৰু মৃতদেহটো ৰে’ল লাইনৰ পৰা উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
