দুৰ্গা পূজাৰ আনন্দৰ মাজতে গুৱাহাটী মহানগৰীত আৰ্থিক অনাতনত ভূগি ৰাজ্যিক পৰিবহণ নিগম (ASTC)ৰ এগৰাকী প্ৰাক্তন গাণনিক বিষয়ায়ে যোৱা নিশা বাচি লয় আত্মহত্যাৰ পথ। নিহত লোকজনৰ নাম অনিল কলিতা।
আজি পুৱা প্ৰায় ৬ বজাত পৰিয়ালৰ লোকে ৰূমৰ ভিতৰত চিপ লৈ থকা অৱস্থাত তেওঁৰ মৃতদেহটো উদ্ধাৰ কৰে। পৰিয়ালৰ লোকে কয় যে ঘৰৰ আন সদস্যসকলে পূজা চাবলৈ যোৱাৰ সময়তে তেওঁ আত্মহত্যা কৰে।
৬২ বছৰীয়া অনিল কলিতাৰ ঘৰ গুৱাহাটী নুনমাটিৰ গোপাল নগৰত।
পৰিয়ালৰ লোকে জনোৱা মতে ২০১৭ চনতেই অৱসৰ গ্ৰহণ কৰা অনিল কলিতাই লাভ কৰা নাছিল পেন্সন। যাৰ বাবে ৫জনীয়া পৰিয়াল চলোৱাত লোকজন যথেষ্ট অসুবিধাৰ সন্মুখীন হ’বলগীয়া হৈছিল।
আনকি ধনৰ অভাৱত সন্তানক উচ্চ শিক্ষা দিব পৰা নাছিল অনিল কলিতাই, লগতে দুজনীকে ছোৱালীক বিয়াও দিব পৰা নাই বুলি কয় পৰিয়ালৰ লোকে।
আৰ্থিক অভাবৰ ফলতে মানসিকভাৱে ভাঙি পৰি তেওঁ এই আত্মঘাতী সিদ্ধান্ত ল’বলৈ বাধ্য হ’ল বুলি অভিযোগ তথা একপ্ৰকাৰ সংশ্লিষ্ট বিভাগক দায়ী কৰি সমগ্ৰ ঘটনা সন্দৰ্ভত অনিল কলিতাৰ পৰিয়ালৰ লোকে নুনমাটি আৰক্ষী থানাত এখন এজাহাৰ দাখিল কৰিছে।
ইতিমধ্য লোকেজনৰ মৃতদেহ মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰা হৈছে।
এক অভিযোগ মতে ASTCৰ পৰা অৱসৰ গ্ৰহণ কৰা বহু বিষয়া-কৰ্মচাৰী পেঞ্চন আদি সুবিধাৰ পৰা বঞ্চিত হৈ আহিছে। কৰ্মচাৰী সকলে ইয়াৰ প্ৰতিবাদ কৰিছে যদিও বিভাগৰ উচ্চ পদস্থৰ বিষয়াৰ দাদাগিৰীৰ বাবে বিষয়টো পোহৰলৈ অহা নাছিল।