দেশৰ চাৰিটা ৰাষ্ট্ৰীয়কৃত সংস্থাক ব্যক্তিগতকৰণৰ বাবে আগবাঢ়িছে কেন্দ্ৰীয় চৰকাৰ। এই সন্দৰ্ভত অচিৰেই কেন্দ্ৰীয় মন্ত্ৰীসভাই প্ৰস্তাৱ অনাৰ বাবে সাজু হৈছে।
সূত্ৰৰ পৰা জানিব পৰা মতে, অহা মাহত অৰ্থাৎ নৱেম্বৰত মন্ত্ৰীসভাৰ বৈঠক হোৱাৰ সম্ভাৱনা আছে।
উক্ত মন্ত্ৰীসভাৰ বৈঠকতে ভাৰত পেট্ৰ’লিয়ামকে ধৰি চাৰিটা ৰাষ্ট্ৰীয়কৃত সংস্থাক মোদী চৰকাৰে ব্যক্তিগত সংস্থাৰ হাতত তুলি দিয়াৰ সিদ্ধান্ত গ্ৰহণ কৰিব পাৰে।
সূত্ৰ অনুসৰি ব্যক্তিগতকৰণৰ বাবে নিৰ্বাচিত এই চাৰিটা সংস্থা হৈছে ভাৰত পেট্ৰ’লিয়াম, ছিপিং কৰ্পোৰেশ্যন অফ ইণ্ডিয়া, ডিএইডিচি আৰু নীপকো।
এই সন্দৰ্ভত কেন্দ্ৰই ইতিমধ্যে আইন সংশোধন কৰিছে। সেয়েহে, মন্ত্ৰীসভাৰ অনুমোদন অবিহনেও এই চাৰিটা ৰাষ্ট্ৰীয়কৃত সংস্থাৰ ব্যক্তিগতকৰণ সম্ভৱ হ’ব পাৰে।
অৱশ্যে,নতুন দিল্লীয়ে সংস্থা চাৰিটা ব্যক্তিগতকৰণৰ প্ৰস্তাৱৰ সপক্ষেই ইংগিত দিছে।
উল্লেখযোগ্য যে ২০০৩ বৰ্ষত উচ্চতম ন্যায়ালয়ে এক ৰায়ত স্পষ্ট কৰি দিছিল যে ভাৰত পেট্ৰ’লিয়াম তথা হিন্দুস্তান পেট্ৰ’লিয়ামৰ দৰে সংস্থ্যক বিক্ৰী বা ব্যক্তিকৰণ কৰিবলৈ হ’লে কেন্দ্ৰই প্ৰথমতে আইন সলনি কৰিব লাগিব।
জানিব পৰা মতে, সম্প্ৰতি ভাৰত পেট্ৰ’লিয়ামৰ সম্পদৰ পৰিমাণ হৈছে ১.১১ লাখ কোটি টকা।
কেন্দ্ৰই আইন সলনি কৰি চৰকাৰৰ হাতত থকা ৫৩.৩ শতাংশ শ্বেয়াৰ বিক্ৰী কৰিছে।
