ডিমা হাছাও জিলাৰ উমৰাংছুত থকা কপিলী জলবিদ্যুত প্ৰকল্পত সংঘটিত দুৰ্ঘটনা সম্পৰ্কত মুখ্য মন্ত্ৰী সৰ্বানন্দ সোণোৱালে আজি নেপকো কৰ্তৃপক্ষৰ সৈতে ব্ৰহ্মপুত্ৰ ৰাজ্যিক অতিথিশালাত এক আলোচনাত মিলিত হয়।
ৰাজ্য চৰকাৰৰ উচ্চ পদস্থ বিষয়াৰ উপস্থিতিত অনুষ্ঠিত হোৱা এই বৈঠকত মুখ্য মন্ত্ৰীয়ে কপিলী জলবিদ্যুত প্ৰকল্পত সংঘটিত হোৱা ঘটনা সন্দৰ্ভত নেপকো কৰ্তৃপক্ষৰ পৰা সবিশেষ বুজ লোৱাৰ উপৰি ঘটনা সংঘটিত হোৱাৰ পাছত লোৱা সুৰক্ষা তথা অন্যান্য বিষয় সমূহৰো বুজ লয়।
বৈঠকত সোণোৱালে ভৱিষ্যতে যাতে এনেধৰণৰ ঘটনা সংঘটিত নহয় তাৰ বাবে উপযুক্ত সুৰক্ষামূলক ব্যৱস্থা গ্ৰহণৰ দিশত যাৱতীয় পদক্ষেপ ল’বলৈও নেপকো কৰ্তৃপক্ষক নিৰ্দেশ দিয়ে।
আনহাতে, মুখ্য মন্ত্ৰী সোণোৱালে ঘটনাৰ তদন্তৰ বাবে দক্ষিণ অসম মণ্ডলৰ আৰক্ষী মহাপৰিদৰ্শক পি কে দত্তক নিৰ্দেশ দিয়াৰ উপৰি পাৰ্বত্য অঞ্চল উন্নয়ন বিভাগৰ মন্ত্ৰী চুম ৰংহাঙৰ নেতৃত্বত এটা উচ্চস্তৰীয় গোটক ঘটনাস্থলী পৰিদৰ্শন কৰি সবিশেষ বুজ লোৱাৰ বাবেও নিৰ্দেশ দিয়ে।
চুম ৰংহাঙৰ নেতৃত্বত গঠিত পৰিদৰ্শন গোটত সাংসদ হৰেন সিং বে, বিধায়কদ্বয় ক্ৰমে বীৰভদ্ৰ হাগজেৰ, ডাঃ নোমল মমিন আৰু ডিমা হাছাও স্বায়ত্ত শাসিত পৰিষদৰ মুখ্য কাৰ্য্যবাহী দেৱোলাল গাৰ্লোচাক অন্তৰ্ভূক্ত কৰা হৈছে। এই গোটটোৱে ঘটনাস্থলী পৰিদৰ্শন কৰি শেহতীয়া পৰিস্থিতিৰ বুজ লৈ মুখ্য মন্ত্ৰীক অৱগত কৰিব।
আজিৰ বৈঠকত পাৰ্বত্য অঞ্চল উন্নয়ন বিভাগৰ মন্ত্ৰী চুম ৰংহাং, মুখ্য মন্ত্ৰীৰ মিডিয়া উপদেষ্টা হৃষীকেশ গোস্বামী, মুখ্য মন্ত্ৰীৰ আইন উপদেষ্টা শান্তনু ভৰালী, গৃহ বিভাগৰ দায়িত্বত থকা অতিৰিক্ত মুখ্য সচিব কুমাৰ সঞ্জয়, এ পি ডি চি এলৰ অধ্যক্ষ বিনোদ কুমাৰ পিপাৰচেনীয়া, মুখ্য মন্ত্ৰীৰ সচিব সঞ্জয় লোহিয়াৰ লগতে নেপকোৰ উচ্চপদস্থ বিষয়াসকল উপস্থিত থাকে।
