তিনিচুকীয়া জিলাৰ শংকৰ চাহ বাগিচাৰ এগৰাকী কৰ্মচাৰীক শুকুৰবাৰে সন্ধিয়া এটা অস্ত্ৰধাৰী যুৱকৰ দলে অপহৰণ কৰি লৈ যোৱাক কেন্দ্ৰ কৰি সমগ্ৰ চাহ বাগিচাখনত তীব্ৰ চাঞ্চল্যই বিৰাজ কৰিছে।
অপহৃত ব্যক্তিগৰাকীৰ নাম গৌৰাং চন্দ্ৰ দেৱ (৫৫) বুলি জানিব পৰা গৈছে। তেওঁ শংকৰ চাহ বাগিচাত হেড ফিটাৰ হিচাপে কৰ্মৰত আছিল।
ঘটনা সন্দৰ্ভত স্থানীয় নাগৰিকৰ ভাষ্য অনুসৰি, শুকুৰবাৰে সন্ধিয়া সামৰিক পোছাকত অহা এটা চাৰিজনীয়া অস্ত্ৰধাৰী অপহৰণকাৰী দলে বাগিচাখনৰ পৰাই গৌৰাঙক অপহৰণ কৰি লৈ যায়।
অত্যাধুনিক অস্ত্ৰৰে সু-সজ্জিত হৈ অহা দলটোৱে প্ৰথমে বাগিছাখনৰ কলঘৰত প্ৰবেশ কৰি বাগিচাখনৰ মুখ্য পৰিচালক ছহিউল হক আলীক বিচাৰি নাপাই কলঘৰত হেড ফিটাৰ ৰূপে কৰ্মৰত গৌৰাং চন্দ্ৰ দেৱ’(৫৫) ওলাই অহা দেখা পাই দলটোৱে উঠাই লৈ যায়।
অপহৰণ কাণ্ডৰ সৈতে আলফা স্বাধীন জড়িত থকা বুলি সন্দেহ প্ৰকাশ কৰাৰ লগতে ধন দাবীক কেন্দ্র কৰিয়ে অপহৰণ কাণ্ডটো সংঘটিত হৈছে বুলি ধাৰণা কৰা হৈছে।
ইতিমধ্যে সেনা আৰু আৰক্ষীয়ে সমগ্ৰ ধলা অঞ্চলত অপহৰণকাৰী দলটোক বিচাৰি তীব্ৰ অভিযান আৰম্ভ কৰিছে।
আৰক্ষীৰ তদন্তত পৰৱৰ্তী সময়ত অপহৰণ কাণ্ডৰ সৈতে কোন সংগঠন জড়িত হৈ আছে সেই কথা পোহৰলৈ অহাৰ সম্ভাৱনা আছে।
