সাধাৰণতে সকলোৱে কল খাই ভাল পায়। কিন্তু কল খাওঁতে আপুনি সাৱধান হওঁক। আপুনি কল খাই শৰীৰত হাতীৰ সমান বল কৰিম বুলি ভাবিছে যদি চাই চিতিহে খাওঁক।
অনথ্যা বিষাক্ত ৰাসায়নিক দ্ৰব্য ব্যৱহাৰ কৰি পকোৱা কল খাই আপুনি পেট আৰু বুকুৰ মাৰাত্মক ৰোগত ভুগিবলগীয়া হ’ব পাৰে।
কিয়নো নৰ্থ ইষ্ট নাওৰ মহানগৰৰ সাংবাদিকে চলোৱা এক অভিযানত পোহৰলৈ আহিছে কেতবোৰ ভয়ংকৰ তথ্য।
মহানগৰীৰ ছয়মাইলৰ সমীপৱৰ্তী দ্বাৰন্ধা অঞ্চলৰ বীমা পথৰ এটা ভাৰাতীয়া ৰুমত কিছুসংখ্যক অসাধু ব্যৱসায়ীয়ে চলাই আহিছে এৰাতিৰ ভিতৰতে কেঁচা কল পকোৱাৰ দৰে দুস্কাৰ্য।
গ্ৰাহকৰ স্বাস্থ্যৰ প্ৰতি লক্ষ্য নাৰাখি তেওঁলোকে অধিক মুনাফা লাভ কৰিবলৈ কেলচিয়াম কাৰবাইড ব্যৱহাৰ কৰি এদিনৰ ভিতৰতে কেঁচা কল পকাই পাছদিনা মহানগৰীৰ ছয়মাইল,পল্টনবজাৰ, বেলতলা, গণেশগুৰি, ফাঁচীবজাৰকে ধৰি অন্যান্য স্থানত বিক্ৰীৰ বাবে উপযুক্ত কৰি তোলে।
নৰ্থ ইষ্ট নাওৰ চৰজমিন তদন্তত পোহৰলৈ আহিছে যে এই ৰমৰমীয়া ব্যৱসায় চলাই আছে হজৰত আলি নামৰ এজন অসাধু ব্যৱসায়ীয়ে।
তেওঁৰ সৈতে উক্ত অঞ্চলৰে এজন জোনাবো জৰিত থকা বুলি এক সুত্ৰৰ পৰা জানিব পৰা গৈছে। বহু বছৰ ধৰি বিজু আহমেদ নামৰ লোকজনৰ ভাড়াঘৰত থাকি তেওঁ কলৰ ব্যৱসায় চলাই আহিছে।
ধূপধৰাৰ পৰা কেঁচা কল আনি কাৰবাইড ব্যৱহাৰ কৰি তাৎক্ষণিকভাৱে পকাই বজাৰত বিক্ৰী কৰাৰ উপযুক্ত কৰি তোলে। মহানগৰীৰ ভিন্নস্থানৰ ফল-মূল বিক্ৰেতাই হজৰতৰ পৰা সেই কল পাইকাৰী দামত কিনি লৈ যায় বুলি সুত্ৰটোৱে দাবী কৰিছে।
নাম প্ৰকাশত অনিচ্ছুক এক সুত্ৰই নিজে সেই স্থানত গৈ কাৰবাইড ব্যৱহাৰ কৰি কল পকোৱাৰ দৃশ্য প্ৰত্যক্ষ কৰিছিল। তাৰ পাছতে নৰ্থ ইষ্ট নাওৰ সাংবাদিক উক্ত স্থানত উপস্থিত হৈ গুদামটোত কাৰবাইডৰ গোন্ধ পোৱাৰ লগতে কাৰবাইড মিহলোৱা কেইটামান বাচনো প্ৰতক্ষ্য কৰিছিল।
গুদামটোত জাহাজী, চেনীচম্পা, মালভোগ কল জমা হৈ থকা দেখিবলৈ পোৱা গৈছিল।
ইপিনে, সাধাৰণ গ্ৰাহকসকলে বজাৰৰ পৰা কাৰবাইডযুক্ত দেখিবলৈ ধুনীয়া লগা কলবোৰ ক্ৰয় কৰি লৈ যায়। সেই সমূহ কল বাহিৰৰ পৰা দেখিবলৈ ধুনীয়া হ’লেও সোৱাদ কম হয়।
এতিয়া প্ৰশ্ন আহি পৰিছে কেনেদৰে চিনাকি কৰিব কৰবাইড ব্যৱহাৰ কৰি পকোৱা কল আৰু প্ৰাকৃতিকভাৱে নিজে পকা কলৰ মাজৰ পাৰ্থক্য?
কাৰবাইড ব্যৱহাৰ কৰি পকোৱা কল সাধাৰণতে পাতল হালধীয়া(পকা নেমু ৰং) ৰঙৰ হয় আৰু সেই কলবিলাকত সাধাৰণতে কলা দাগ অথবা ফুট নাথাকে।
আনহাতে, প্ৰাকৃতিকভাৱে পকা কলবোৰ ডাঠ হালধীয়া হোৱাৰ লগতে বাকলিটোত কলা ৰঙৰ দাগ আৰু ফুট ফুট থাকে। সেই কলসমূহ সোৱাদযুক্ত হয়।
তাৎপৰ্য্যপূৰ্ণভাৱে, কেলচিয়াম কাৰবাইড ব্যৱহাৰ কৰি কৃত্ৰিমভাৱে পকোৱা কল খাই আপুনি সন্মুখীন হ’বলগীয়া হ’ব বহুতো বেমাৰৰ। কাৰ্বাইড অতি বিষাক্ত আৰু আৰ্চেনিকযুক্ত।
কাৰ্বাইডত এক্টাইলিন গেছ, ফচফাইন, এৰচাইন আদি দ্ৰব্য মিহলি হৈ থাকে। যাৰ পৰা বমি, কফ, ডায়েৰিয়া, আলচাৰ, পেট-বুকুৰ জ্বলন-পোৰণ, ডিঙিৰ বিষ হ’ব পাৰে।
এক সুত্ৰৰ পৰা জানিব পৰা মতে, মহানগৰীৰ মালিগাঁৱতো একাংশ অসাধু ব্যৱসায়ীয়ে কাৰ্বাইড ব্যৱহাৰ কৰি কল পকাই বিক্ৰী কৰি আহিছে। পৰৱৰ্তী প্ৰতিবেদনত আমি প্ৰকাশ কৰিম আৰু বহু ভয়ংকৰ তথ্য।
উল্লেখ কৰিব পাৰি যে, মহানগৰীত খাদ্য সুৰক্ষা বিভাগে বিভিন্ন সময়ত কাৰ্বাইডযুক্ত ফল-মূলৰ বিৰুদ্ধে অভিযান চলাই আহিছে যদিও বৰ্তমান যেন গভীৰ নিদ্ৰাত বিভাগীয় বিষয়াসকল।
কিয়নো তেওঁলোকৰ নাকৰ তলেৰেই মহানগৰীত এইদৰে একাংশ দুষ্ট চক্ৰই চলাই গৈছে ৰমৰমীয়া ব্যৱসায়।
