‘ব্লেকমেইলিং’ৰ বলি হৈ কংগ্ৰেছ এৰি অগপলৈ যাব নেকি শৰ্মা? কি ক’লে শৰ্মাৰ সতীৰ্থ অপূৰ্ব ভট্টাচাৰ্য্যই?
কংগ্ৰেছৰ জ্যেষ্ঠ মুখপাত্ৰ জয়নাথ শৰ্মাই কাইলৈ পুনৰ নিজা ঘৰ অগপলৈ উভতি যোৱাটো নিশ্চিত হৈছে।
১৪ অক্টোবৰত ৰাজ্যখনৰ প্ৰধান আঞ্চলিক দলটোৰ ৩৫ সংখ্যক প্ৰতিষ্ঠা দিৱস আৰু অভয়াপুৰীত অনুষ্ঠিত হ’ব লগীয়া প্ৰতিষ্ঠা দিৱসৰ এটা কাৰ্য্যসূচীতে পুনৰ দলটোত যোগদান কৰিব শৰ্মাই।
শৰ্মাই ২০১৫ চনৰ ১৪ ডিচেম্বৰত অগপ এৰি কংগ্ৰেছত যোগদান কৰিছিল।
অসম আন্দোলনৰ সময়ত আছুৰ মুখ্য আহ্বায়ক হিচাপে কাৰ্য্যনিৰ্বাহ কৰা তথা অগপৰ প্ৰতিষ্ঠা কালৰে পৰা জড়িত থকা শৰ্মাই অগপৰ চৰকাৰত ৰাজহ মন্ত্ৰী হিচাপে কাৰ্য্য নিৰ্বাহ কৰিছিল।
কংগ্ৰেছৰ জ্যেষ্ঠ মুখপাত্ৰৰ দৰে গুৰুত্বপূৰ্ণ পদত থকা জয়নাথ শৰ্মাই হঠাতে দলটো এৰিব বিচৰাৰ আঁৰত কি কাৰণ আছে সেইটো এতিয়ালৈকে তেওঁ ৰাজহুৱা কৰা নাই।
এই সম্পৰ্কত জানিবৰ বাবে নৰ্থ-ইষ্ট নাওৰ তৰফৰ পৰা শৰ্মাৰ সৈতে যোগাযোগ কৰাৰ চেষ্টা কৰা হৈছিল যদিও তেওঁৰ সঁহাৰি পোৱা নগ’ল।
অৱশ্যে কংগ্ৰেছৰ আন এজন জ্যেষ্ঠ মুখপাত্ৰ তথা শৰ্মাৰ সতীৰ্থ অপূৰ্ব ভট্টাচাৰ্য্যই জয়নাথ শৰ্মাৰ অগপ গমনৰ আঁৰত ৰাজনৈতিক আক্ৰোশ থকাৰ সম্ভাৱনাৰ ব্যক্ত কৰে।
“শৰ্মা বিশেষ কিছুমান ৰাজনৈতিক আক্ৰোশৰ সন্মুখীন হ’ব লগীয়া হৈছে। সেইকাৰণে অগপত যোগদানৰ সিদ্ধান্তটো লৈছে। বিভিন্ন ক্ষেত্ৰৰ পৰা তেওঁৰ ওপৰত হেঁচা প্ৰয়োগ কৰা হৈছে। যি কাৰণে তেওঁ এনে এটা ৰাজনৈতিক সিদ্ধান্ত ল’বলৈ বাধ্য হৈছে”, আমাৰ সাংবাদিক সৈতে হোৱা টেলিফোনিক বাৰ্তালাপত এইদৰে কয় ভট্টাচাৰ্য্যই।
চৰকাৰী পক্ষৰ হেঁচাৰ ইংগিত দি ভট্টাচাৰ্য্যই জানিবলৈ দিয়ে, জয়নাথ শৰ্মাৰ মালিকানাধীন এটা শৈক্ষিক প্ৰতিষ্ঠানৰ অনুমতি কৰ্তন কৰি দিয়া হৈছে।
আনহাতে শৰ্মা কংগ্ৰেছৰ পৰা ওলাই গ’লেও কংগ্ৰেছ দলৰ ক্ষতি নহয় বুলি দাবী ভট্টাচাৰ্য্যৰ।
“কংগ্ৰেছ দলৰ পৰা বহু শক্তিশালী নেতা ওলাই গৈছে। তৃণমূল কৰ্মীসকলহে প্ৰকৃতাৰ্থত দলৰ চালিকা শক্তি। কোনো নেতাৰ গমনত সাময়িকভাৱে দলটো অস্বস্তিত পৰে, কিন্তু দলটোৰ বিশেষ ক্ষতি নহয়”, জয়নাথ শৰ্মাই অগপত যোগদানৰ সিদ্ধান্ত সলনি কৰাৰ আশাত থকা বুলি জানিবলৈ দি ভট্টাচাৰ্য্যৰ মন্তব্য।
