ভাৰতীয় ক্ৰিকেট তাৰকা ইৰফান পাঠানে কেৰিয়াৰৰ দ্বিতীয় ইনিংছ আৰম্ভ কৰিবলৈ সাজু হৈছে। এইবাৰ এক নতুন ভূমিকাত অৱতীৰ্ণ হ’বলৈ আগবাঢ়িছে ফাষ্ট বলিঙেৰে বেটছমেনৰ বাবে সন্ত্ৰাসৰ সৃষ্টি কৰা বাওহতীয়া বলাৰ পাঠানে।
কিন্তু এইবাৰ খেলপথাৰত নহয়, পাঠানক দেখা যাব শ্বুটিং ফ্ল’ৰতহে। এগৰাকী অভিনেতা হিচাপে কেমেৰাৰ সন্মুখত প’জ দিব ইৰফানে।
ক্ৰিকেট জগতত দুৰ্ধৰ্ষ বলাৰ হিচাপে পৰিচিত ক্ৰিকেটাৰ গৰাকীয়ে এইবাৰ কেমেৰাৰ প্ৰত্যাহ্বান গ্ৰহণ কৰিবলৈ সাজু হৈছে।
সেইবুলি বলীউদৰ কোনো ছবিত নহয়, বৰঞ্চ দক্ষিণৰ ছবিতহে অভিনয় কৰিবলৈ আগবাঢ়িছে ছুইং মাষ্টাৰগৰাকীয়ে।
পাঠানে অভিনয় কৰিবলগীয়া ছবিখনৰ নাম হৈছে ‘বিক্ৰম-৫৮’। ছবিখনৰ পৰিচলনা কৰিব দক্ষিণৰ জনপ্ৰিয় পৰিচালক অজয় জ্ঞানামুথুৱে।
অৱশ্যে, ইৰফানে কেনেধৰণৰ চৰিত্ৰত অভিনয় কৰিব সেয়া প্ৰকাশ কৰা নাই যদিও সূত্ৰসমূহৰ পৰা জানিব পৰা মতে ক্ৰিকেটাৰগৰাকীক ‘বিক্ৰম-৫৮’ত এজন তুৰ্কীভাষী লোকৰ চৰিত্ৰত দেখা পোৱা যাব।
সদ্যহতে, তেওঁৰ ছ’চিয়েল মিডিয়াত কৰা এটা প’ষ্টত ইৰফানে লিখিছে: ‘নতুন উদ্যোগ, নতুন প্ৰত্যাহ্বানৰ বাবে অধীৰ আগ্ৰহেৰে অপেক্ষা কৰিছো।‘
ইৰফান পাঠানে অভিনয় কৰিবলগীয়া এই ছবিখনৰ সংগীত পৰিচালনা কৰিব এ আৰ ৰহমানে। ছবিখনৰ মূল চৰিত্ৰ এটাত অভিনয় কৰিব দক্ষিণৰ এগৰাকী জনপ্ৰিয় অভিনেতা বিক্ৰমে।
ইৰফান পাঠানে ২০১২ চনত শেষবাৰৰ বাবে দেশৰ জাৰ্ছি পৰিধান কৰি খেলপথাৰত নামিছিল।
