নুমলীগড় শোধানাগাৰক ব্যক্তিগতকৰণৰ বাবে গ্ৰহণ কৰা কেন্দ্ৰৰ পদক্ষেপক বিৰোধিতা কৰি কলিয়াবৰৰ সাংসদ গৌৰৱ গগৈয়ে সোমবাৰে প্ৰধান মন্ত্ৰী নৰেন্দ্ৰ মোদীলৈ এখন পত্ৰ লিখিছে।
সাংসদগৰাকীয়ে নুমলীগড় শোধানাগাৰৰ ব্যক্তিগতকৰণ বন্ধ ৰখাৰ লগতে স্থানীয় অসমীয়া লোকৰ স্বাৰ্থ সুৰক্ষিত কৰিবলৈ প্ৰধান মন্ত্ৰীক অনুৰোধ জনায়।
কেন্দ্ৰই ব্যক্তিগকৰণ কৰিবলৈ পদক্ষেপ গ্ৰহণ কৰা ভাৰত পেট্ৰলিয়াম কৰ্পোৰেশ্যন লিমিটেডৰ গোলাঘাট জিলাত অৱস্থিত নুমলীগড় শোধানাগাৰত ৬১.৬৫ শতাংশ অংশীদাৰিত্ব আছে আৰু অসমৰ প্ৰায়ভাগ সংগঠনেই ইয়াৰ বিৰোধিতা কৰিছে।
‘’ভাৰত পেট্ৰ’লিয়ামৰ ব্যক্তিগতকৰণে নুমলীগড় শোধানাগাৰৰো ব্যক্তিগতকৰণৰ বাট মুকলি কৰিব,’’-প্ৰধান মন্ত্ৰীলৈ লিখা পত্ৰখনত সাংসদগৰাকীয়ে কয়।
‘’এই পদক্ষেপৰ বিৰুদ্ধে ৰাইজৰ এক আবেগৰ বহিৰ্প্ৰকাশ ঘটিছে। তদানীত্বন প্ৰধান মন্ত্ৰী ৰাজীৱ গান্ধীয়ে অসম চুক্তিত আগবঢ়োৱা ঐতিহাসিক প্ৰতিশ্ৰুতিৰ পৰিণতিত জন্ম হৈছিল নুমলীগড় শোধানাগাৰৰ,’’-গগৈয়ে কয়।
‘’সেয়েহে নুমলীগড় শোধানাগাৰৰ সৈতে এক আঞ্চলিক মূল্যবোধ তথা ইতিহাস জড়িত হৈ আছে। দ্বিতীয়তে, শোধনাগাৰটো এটা লাভজনক উদ্যোগ হৈ আছে। অক্টোবৰ ২০০০’ৰ পৰা নুমলীগড় শোধানাগাৰে ৰাষ্ট্ৰীয় তথা ৰাজ্যিক কোষাগাৰলৈ ৩০,০০০কোটিতকৈও অধিক টকা আদায় দিছে,’’-সাংসদগৰাকীয়ে কয়।
Numaligarh Refinery is a historic commitment to the people of Assam. It’s privatisation will be a betrayal of the Assam Accord and the people of Assam. Sharing my letter to PM Modi. pic.twitter.com/IaOkghNiP3
— Gaurav Gogoi (@GauravGogoiAsm) October 21, 2019
কংগ্ৰেছ নেতা গৌৰৱ গগৈয়ে দাবী কৰে যে ‘’ নুমলীগড় শোধানাগাৰে গোলাঘাট জিলাৰ আৰ্থ-সামাজিক বিকাশত গুৰুত্বপূৰ্ণ বৰঙণি আগবঢ়াইছে।‘’
তেওঁ ই স্থানীয় যুৱকসকলৰ বাবে, বিশেষকৈ খিলঞ্জীয়া লোকৰ সংস্থাপনৰ সুযোগ বৃদ্ধি কৰিছে বুলি কয়।
তদুপৰি, নুমলীগড় শোধানাগাৰে পৰিৱেশ অনুকুল প্ৰযুক্তি গ্ৰহণ কৰি তথা অনুকুল ইন্ধন উৎপাদনৰ দ্বাৰা অঞ্চলটোত পৰিৱেশ সংৰক্ষণত আগভাগ লৈছে।
নুমলীগড় শোধানাগাৰে লগতে আন্ত:গাঁথনি উন্নয়ন, গ্ৰাম্য বৈদ্যুতিকৰণ আৰু কলা-সাহিত্যৰ বিকাশকে ধৰি বহু সামাজিক দায়বদ্ধতাৰ দিশত জড়িত হৈ আছে বুলি সাংসদগৰাকীয়ে তেওঁৰ পত্ৰখন উল্লেখ কৰে।
‘’বিকাশ তথা আৰ্থ-সামজিক উন্নয়নত ধাৰাবাহিকতা দাঙি ধৰা নুমলীগড় শোধানাগাৰে ৰাজহুৱা খণ্ডৰ উদ্যোগৰ (পি এছ য়ু) মিনি ৰত্ন সন্মানো লাভ কৰিছে,’’-গগৈয়ে কয়।
‘’ নুমলীগড় শোধানাগাৰৰ ব্যক্তিগতকৰণে কেৱল স্থানীয় লোকৰ আবেগ তথা অসমৰ ইতিহাসক আঘাত কৰাই নহয়, কিন্তু ই লগতে বহু স্থানীয় লোকক কৰ্মসংস্থাপনহীন আৰু অসুৰক্ষিত কৰিও তুলিব,’’-সাংসদগৰাকীয়ে লগতে দাবী কৰে।