জনপ্ৰিয় ছ’চিয়েল মিডিয়া ফেইচবুকে য়ুজাৰক দিয়া ইয়াৰ সুবিধাবোৰৰ ভিতৰত বাতৰি (নিউজ)ক সংযোজন কৰাৰ এটা বৃহৎ পদক্ষেপ গ্ৰহণ কৰিছে।
আমেৰিকাৰ সংবাদ প্ৰতিষ্ঠানবোৰত এই ডাঙৰ খবৰটো প্ৰকাশ পাইছে আৰু এই পদক্ষেপক বিশ্বৰ বিভিন্ন সংবাদ প্ৰতিষ্ঠানবোৰে উৎসাহজনক অগ্ৰগতি হিচাপে জ্ঞান কৰা দেখা গৈছে।
২৫ অক্টোবৰত ফেইচবুকে এই গুৰুত্বপূৰ্ণ ঘোষণাটো কৰে আৰু মুখ্য কাৰ্য্যবাহী বিষয়া মাৰ্ক জুকাৰবাৰ্গে নিউয়ৰ্কত ইয়াৰ শুভাৰম্ভ কৰে।
Vox নামৰ বাতৰি প্ৰতিষ্ঠানটো বাতৰিটোৰ সৈতে দিয়া বিৱৰণ মতে, এতিয়াৰ পৰা য়ুজাৰসকলে ফেইচবুকত এটা news tab-ৰ আইকন দেখিবলৈ পাব, য’ত ক্লিক কৰিলে নিৰ্বাচিত নিউজবোৰৰ হেডলাইনবোৰ দেখা পাব।
য়ুজাৰে এই হেডলাইনত ক্লিক কৰিলে নিৰ্দিষ্ট সংবাদ প্ৰতিষ্ঠানটোৰ ৱেবছাইটলৈ ৰিডাইৰেক্ট হ’ব আৰু বাতৰিটো বিনামূলীয়াকৈ পঢ়িব পাৰিব। আনকি পেইমেণ্ট কৰি পঢ়িব লগীয়া নিউজ আইটেমবোৰো ইয়াৰ জৰিয়তে গ’লে বিনামূলীয়াকৈ পঢ়িব পৰা যাব।
অৱশ্যে এয়া এটা “alpha” ভাইৰ্ছন (পৰীক্ষামূলক) হৈ আছে আৰু এতিয়া আমেৰিকাৰ কেইলাখ মান মানুহৰ বাবেহে উপলব্ধ হৈছে।
য়ুজাৰৰ বাবে দিব লগীয়া বাতৰিবোৰ নিৰ্বাচনৰ বাবে ফেইচবুকৰ এডিটৰমণ্ডলী থাকিব, বাতৰি প্ৰতিষ্ঠানটোত প্ৰকাশ।
নিজৰ য়ুজাৰক দিবৰ বাবে ফেইচবুকে নিউজ সংগ্ৰহ কৰিব নিৰ্বাচিত কিছুমান বাতৰি প্ৰতিষ্ঠানৰ পৰা, যিবোৰক নিউজ পাৰ্টনাৰ বুলি কোৱা হৈছে।
গুৰুত্বপূৰ্ণ কথাটো হৈছে, চুক্তিবদ্ধ সংশ্লিষ্ট বাতৰি প্ৰতিষ্ঠানক ফেইচবুকে বৃহৎ অংকৰ ধন দিব। তিনি বছৰৰ চুক্তিত প্ৰতি বছৰত তিনি নিযুত ডলাৰ পৰ্য্যন্ত দিব পাৰে, Vox ৰ লগতে আমেৰিকাৰ আন কিছু সংখ্যক সংবাদ প্ৰতিষ্ঠানৰ দাবী।
বৰ্তমানলৈকে ফেইচবুকে য়ু এছ টুডে’, ৱাল ষ্ট্ৰীট জাৰ্নেল আদিৰ দৰে বৃহৎ প্ৰতিষ্ঠানৰ উপৰি আঞ্চলিক বাতৰি প্ৰতিষ্ঠানৰ বাতৰিও অন্তৰ্ভুক্ত কৰিছে।
ফেইচবুকৰ এই নিউজ পাৰ্টনাৰিং পদক্ষেপে ভাৰতৰ বাতৰি প্ৰতিষ্ঠানবোৰৰ বাবে বৃহৎ সুযোগ আনি দিব পাৰে বুলি আশা কৰা হৈছে। কিয়নো, সফল পৰীক্ষা সম্পন্ন হোৱাৰ পিছত ভাৰতৰ দৰে বৃহৎ সংখ্যক য়ুজাৰ থকা দেশত ইয়াৰ ৰূপায়ণ এৰাই চলা ছ’চিয়েল মিডিয়া কোম্পানিটোৰ বাবে কঠিন হ’ব।
দেশ হিচাপে ভাৰতত বিশ্বৰ ভিতৰতে সৰ্বাধিক সংখ্যক য়ুজাৰ আছে ফেইচবুকৰ।
ফেইচবুকত এই নতুন শিতানটোৰ সংযোজন হ’লেও পূৰ্বৰ দৰেই মূল পেইজৰ পৰা বাতৰিবোৰ আঁতৰাই দিয়া নহয়, বাতৰি প্ৰতিষ্ঠানটো কোৱা হৈছে।
