শিৱসাগৰ জিলাৰ নাজিৰাত বৃহস্পতিবাৰে ৰাতি মাটি খহি ওলোৱা এটা গুপ্ত সুৰংগক লৈ চাঞ্চল্যৰ সৃষ্টি হৈছে।
নাজিৰাৰ হাতীপটিত এটা পূজা মণ্ডপৰ মাটি খহি এই শিলেৰে নিৰ্মিত সুৰংগটো পোহৰলৈ আহিছে।
খবৰটো বিয়পি পৰাৰ লগে লগে নিশাৰে পৰা শুকুৰবাৰে এই বাতৰি লিখাপৰ্য্যন্ত অসংখ্য লোকে সুৰংগ দৰ্শনৰ হাতীপটিত ভিৰ কৰিছে।
স্থানীয় ৰাইজৰমতে, শেহতীয়া দুৰ্গা পূজাত মণ্ডপটোৰ সন্মুখত দুটা কলপুলি ৰোৱা হৈছিল। পূজাৰ শেষত কলপুলি দুটা উভালি দিয়াত সেই স্থানত এটা গাত সৃষ্টি হয়। বৃহস্পতিবাৰে মণ্ডপৰ সমীপত থকা খেলপথাৰত কেইজনমান যুৱকে ফুটবল খেলি থকা অৱস্থাত বলটো গাতত সোমায় আৰু ফুটবলটো গাতৰ পৰা উলিয়াবলৈ যাওঁতে উদ্ধাৰ হয় সুৰংগটো।
স্থানীয় ৰাইজে আৰক্ষীক খবৰ দিয়াৰ ঘটনাস্থলীত আৰক্ষী উপস্থিত হয়। কিন্তু, অভিযোগমতে মাটি দি সুৰংগটোৰ সন্মুখভাগ বন্ধ কৰিয়েই আৰক্ষীয়ে দায়িত্ব সামৰাত ৰাইজ ক্ষুভিত হৈছে।
ৰাইজে বৃটিশ্ব যুগৰ বুলি সন্দেহ কৰা সুৰংগটো পৰিদৰ্শন কৰিবলৈ বাতৰি লিখালৈকে পুৰাতত্ব বিভাগৰ কোনো বিষয়া-কৰ্মচাৰী উপস্থিত হোৱা নাই। আৰু ৰাইজে এই কথাত অসন্তুষ্টি ব্যক্ত কৰিছে।
লগতে পঢ়ক– শিৱসাগৰ হাঁহচৰাত জিঅ’ই খন্দা গাঁতত উদ্ধাৰ ৰজাদিনীয়া সম্পদ
ছশ বছৰীয়া আহোম যুগৰ নানা ঐতিহাসিক সমলেৰে ভৰপূৰ শিৱসাগৰ জিলাৰ বিভিন্ন প্ৰান্তত আজিও প্ৰায়ে বহু ঐতিহাসিক সম্পদ উদ্ধাৰ হৈ আহিছে।
