নগাঁও জিলাৰ চামগুৰি আৰক্ষী থানাৰ অন্তৰ্গত সোনাৰিবালিত আজি দুপৰীয়াৰ ভাগত সংঘটিত হোৱা এক দুৰ্ঘটনাত সাতজনকৈ লোক গুৰুতৰভাৱে আহত হয়।
জানিব পৰা মতে, সোনাৰিবালিৰ পৰা চামগুৰি অভিমুখে আহি থকা এ এছ ১২ এইছ ১৩৭০ নম্বৰৰ এখন মাৰুতি গাড়ীয়ে আইজুল ধাবাৰ সন্মুখেৰে পুনৰ সোনাৰিবালিৰ দিশে ৩৭ নং ৰাষ্ট্ৰীয় ঘাইপথৰ ওপৰেৰে ঘুৰাবলৈ লোৱাৰ সময়তে নিয়ন্ত্ৰণ হেৰুৱাই পথৰ দাতিতে থকা ইদিছ আলীৰ বাসগৃহ ভাঙি পেলায়।
প্ৰচণ্ড বেগেৰে গাড়ীখনে ঘৰত খুন্দা মৰাৰৰ ফলত ঘৰটোত থকা শিশু মহিলাকে ধৰি মুঠ সাতজন লোক আঘাতপ্ৰাপ্ত হয়।
আঘাত প্ৰাপ্ত লোক কেইগৰাকী হ’ল ক্ৰমে-চুলেমা খাতুন(১৮), তফাজুল আলী(৩),ৰুবুল আলী(৩), চাদিকুল ইছলাম(২২),মৰম বিবি(৫),মইনা খাতুন(২), আৰু জেছমিনা খাতুন (২)।
পিছত ঘটনাস্থলীত চামগুৰি আৰক্ষী উপস্থিত হৈ আঁহত কেইজনক চামগুৰি প্ৰাথমিক স্বাস্থ্য কেন্দ্ৰলৈ প্ৰেৰণ কৰে যদিও আঘাত গুৰুতৰ হোৱাত চিকিৎসকে চাদিকুল, চুলেমা, তফাজুল আৰু ৰুবুল আলীক উন্নত চিকিত্সাৰ বাবে নগাঁও অসামৰিক চিকিত্সালয় লৈ প্ৰেৰণ কৰে।
আনহাতে, গাড়ীখনৰ চালকজনে দুৰ্ঘটনা সংঘটিত কৰিয়ে পলায়ন কৰে।
ইতিমধ্যে আৰক্ষীয়ে গাড়ীখন জব্দ কৰি তদন্ত অব্যাহত ৰাখিছে বুলি জানিব পৰা গৈছে।
উল্লেখযোগ্য যে, গাড়ীয়ে খুন্দা মৰাৰ ফলত আঘাতপ্ৰাপ্ত চাদিকুল ইছলামে ইদিছ আলীৰ ঘৰখনলৈ বিয়াৰ উদেশ্যে ছোৱালী চাবলৈ আহিছিল বুলি জানিব পৰা গৈছে।
