মুখ্য মন্ত্ৰী সৰ্বানন্দ সোণোৱালে বৃহস্পতিবাৰে তেওঁৰ সভাকক্ষত ৰাজ্যৰ ৰাজহ আৰু দুৰ্যোগ ব্যৱস্থাপনা বিভাগে ছপা কৰি প্ৰস্তুত কৰি উলিওৱা নতুন ভূমি নীতি ২০১৯ আনুষ্ঠানিকভাৱে উন্মোচন কৰে।
উল্লেখ্য যে যোৱা ২১ অক্টোবৰতে এই নতুন ভূমি নীতি ২০১৯ত অনুমোদন জনাইছিল।
ৰাজহ আৰু দুৰ্যোগ ব্যৱস্থাপনা বিভাগে সূদীৰ্ঘ ৩০ বছৰৰ পাছত এই ভূমি নীতি প্ৰস্তুত কৰে। অন্তিমবাৰ ১৯৮৯ চনত কৰা হৈছিল।
আনহাতে উক্ত অনুষ্ঠানতে ২০০৭ চনৰ পৰা এতিয়ালৈকে ৰাজহ আৰু দুৰ্যোগ ব্যৱস্থাপনা বিভাগে জাৰি কৰা সকলো নীতি, নিৰ্দেশনা ইত্যাদি সামৰি প্ৰস্তুত কৰা এখন সংকলনো মুখ্য মন্ত্ৰী সোণোৱালে উন্মোচন কৰে।
অনু্ষ্ঠানত ভাষণ প্ৰদান কৰি সোণোৱালে কয়, ‘চৰকাৰে থলুৱা জনসাধাৰণৰ স্বাৰ্থ সুৰক্ষিত কৰাৰ বাবে এখন নতুন ভূমি নীতি প্ৰস্তুত কৰাৰ ওপৰত গুৰুত্ব আৰোপ কৰি আহিছিল। আৰু এইখনে থলুৱা লোকৰ স্বাৰ্থ সুৰক্ষিত কৰিব’।
আনহাতে এই নীতি-নিৰ্দেশনা সমূহ সংকলিত ৰূপত প্ৰকাশ পোৱাৰ ফলত অকল চৰকাৰী-কৰ্মচাৰীয়েই নহয়, জনসাৰণো উপকৃত হ’ব বুলিও মন্তব্য কৰে।
এই অনুষ্ঠানত ৰাজহ আৰু দুৰ্যোগ ব্যৱস্থাপনা বিভাগৰ ৰাজ্যিক মন্ত্ৰী ভৱেশ কলিতা, মুখ্য মন্ত্ৰীৰ আইন উপদেষ্টা শান্তনু ভৰালী, ৰাজহ আৰু দুৰ্যোগ ব্যৱস্থাপনা বিভাগৰ অতিৰিক্ত মুখ্য সচিব কুমাৰ সঞ্জয় কৃষ্ণ আৰু বিভাগৰ শীৰ্ষ বিষয়াসকল উপস্থিত থাকে।
