এন ডি এৰ অংশীদাৰ জে ডি (ইউ)ৰ আশ্বাস যদি সঁচা হয়, তেন্তে নাগৰিকত্ব বিধেয়কক লৈ পুনৰ গঠন হ’ব যুটীয়া সংসদীয় সমিতি।
কেন্দ্ৰ লোক সভাৰ চলিত শীতকালীন অধিৱেশনত বিধেয়কখন গৃহীত কৰিবলৈ সাজু হোৱাৰ মাজতে জে ডি (ইউ)ৰ ৰাষ্ট্ৰীয় সম্পাদক কে চি ত্যাগীয়ে শনিবাৰে এই সন্দৰ্ভত এক মন্তব্য কৰিছে।
“সংসদত উত্থাপনৰ পূৰ্বে বিধেয়কখন যুটীয়া সংসদীয় সমিতিলৈ পঠোৱাৰ আমি পৰামৰ্শ দিম…তাৰ পিছত যি ঐকমত্য তৈয়াৰ হয় তাত আমি সমৰ্থন জনাম,” ত্যাগীয়ে নৰ্থইষ্ট নাওক জনায়।
বিহাৰৰ শাসক দলটোৱে পূৰ্বৰে বিধেয়কখন বিৰোধিতা কৰি অহাৰ কথা উল্লেখ কৰি ত্যাগীয়ে কয় যে এতিয়াও তেওঁলোকে ইয়াৰ বিৰোধিতা কৰে।
দলটোৱে বিষয়টোক লৈ ইতিমধ্যে এন ডি এ’ৰ অংশীদাৰসকলৰ মাজত আলোচনাৰ দাবী উত্থাপন কৰিছে।
বিধেয়ক বিৰোধিতাত জে ডি (ইউ)ৰ সমৰ্থন বিচাৰি ত্যাগীক শনিবাৰে নেছ’ আৰু আছুৰ প্ৰতিনিধি দল এটাই সাক্ষাৎ কৰাৰ পিছতে তেওঁ এই কথা সদৰী কৰিছে।
প্ৰতিনিধি দলটোক নেতৃত্ব দিয়া সমুজ্জ্বল কুমাৰ ভট্টাচাৰ্য্যই নৰ্থইষ্ট নাওক জনোৱামতে, জে ডি (ইউ)এ বিধেয়কখন সদনৰ মজিয়াত বিৰোধিতা কৰিব বুলি প্ৰতিশ্ৰুতি দিছে।
“সাধাৰণভাৱে উত্তৰ-পূবৰ আৰু বিশেষকৈ অসমৰ খিলঞ্জীয়া লোকসকলৰ প্ৰতি বৃহৎ ভাবুকি এই বিধেয়কখনৰ বিৰুদ্ধে জে ডি (ইউ)ৰ সমৰ্থন বিচাৰি আমি ত্যাগীক সাক্ষাৎ কৰিলো,” ভট্টাচাৰ্য্যই জনায়।
প্ৰতিনিধি দলটোত ভট্টাচাৰ্য্যৰ উপৰি আছুৰ সভাপতি দীপাংক নাথ আৰু নেছ’ৰ অধ্যক্ষ চেমুৱেল জিৰৱাও আছিল।
আগৰখন যুটীয়া সংসদীয় সমিতিয়ে বিধেয়কখন গৃ্হীত কৰাৰ পৰামৰ্শ আগবঢ়াইছিল।
“যুটীয়া সংসদীয় সমিতিয়ে পৰামৰ্শ দিয়ে যে সংশোধন কৰা ৰূপত বিধেয়কখন গৃ্হীত কৰিব লাগে আৰু আন মন্তব্য/ পৰামৰ্শসমূহ বিবেচনা কৰিব লাগে,” যোৱা ৪ জানুৱাৰিত অধ্যক্ষ ৰাজেন্দ্ৰ অগ্ৰৱালে স্বাক্ষৰ কৰা প্ৰতিবেদনত উল্লেখ।
২০১৬ চনত বিজেপি নেতৃত্বাধীন চৰকাৰৰ তদানীন্তন গৃহ মন্ত্ৰী ৰাজনাথ সিঙে বিধেয়কখন লোক সভাত উত্থাপন কৰিছিল।
বিধেয়কখনে ভাৰতৰ চুবুৰীয়া পাকিস্তান, বাংলাদেশ আৰু আফগানিস্তানৰ অমুছলমান ধৰ্মীয় সংখ্যালঘু (হিন্দু, বৌদ্ধ, জেন, পাৰ্ছি, শিখ আৰু খ্ৰীষ্টান)ৰ ভাৰতীয়কৰণৰ চৰ্ত শিথিল কৰিব খুজিছিল।
যোৱা মোদী চৰকাৰৰ অন্তিম সময়চোৱাত বিধেয়কখন গৃহীত কৰাৰ চেষ্টা কৰা হৈছিল, কিন্তু ইয়াক অন্তিম মুহূৰ্তত ৰাজ্য সভাত দাখিলৰ পৰা চৰকাৰ বিৰত আছিল।
চলিত শীতকালীন অধিৱেশনত উত্থাপন হ’ব লগা বিধেয়কখন পূৰ্বতকৈ কিছু সালসলনি কৰা হৈছে বুলি অসমৰ মন্ত্ৰী হিমন্ত বিশ্ব শৰ্মাই মন্তব্য কৰিছিল।
শৰ্মাই নতুন বিধেয়কত উত্তৰ-পূবৰ “অনন্য পৰিচয়”ৰ কথা মনত ৰখা হ’ব বুলি জনাইছিল।
কিন্তু, উত্তৰ-পূবৰ প্ৰতিবাদী সংগঠনসমূহে কোনো ৰূপতেই বিধেয়কখন গ্ৰহণ নকৰে বুলি ভাৰত চৰকাৰক জনাই আহিছে।
