ভাৰতত প্ৰথমবাৰৰ বাবে অনুষ্ঠিত হোৱা দিবা-নৈশ টেষ্ট মেচখনত ভাৰতে বাংলাদেশক এক ইনিংছ আৰু ৪৬ ৰানৰ বৃহৎ ব্যৱধানত পৰাস্ত কৰি শৃংখলাটো ২-০ত দখল কৰে।
ভাৰতীয় পেচ বলাৰৰ দুৰ্দান্ত প্ৰদৰ্শনৰ বাবেই বাংলাদেশক ইনিংছ ব্যৱধানত পৰাস্ত কৰিবলৈ সক্ষম হয়।
কলকাতাৰ ইডেন গাৰ্ডেনত অনুষ্ঠিত মেচখনত প্ৰথম ইনিংছৰ দৰে দ্বিতীয় ইনিংছতো প্ৰত্যাহ্বান জনোৱাত ব্যৰ্থ হয় আলহী দলটো। দলটোৱে ১৯৫ ৰানতে নিজৰ দ্বিতীয় ইনিংছ সামৰে।
দ্বিতীয় ইনিংছত ভাৰতৰ হৈ পেচবলাৰ উমেশ যাদৱে পাঁচটা উইকেট দখল কৰাৰ লগতে ঈশান্ত শৰ্মাই চাৰিটা উইকেট লাভ কৰে।
উল্লেখ্য যে মেচখনত প্ৰথমে বেট ধৰি বাংলাদেশে মাত্ৰ ১০৬ ৰানতে প্ৰথম ইনিংছ সামৰিছিল। ভাৰতৰ ঈশান্ত শৰ্মাই লাভ কৰিছিল পাঁচটা উইকেট।
ইফালে ভাৰতে অধিনায়ক বিৰাট কোহলীৰ শতকৰ লগতে পুজাৰা আৰু ৰাহানেৰ অৰ্ধশতকৰ সহায়ত ৩৪৭ ৰান সংগ্ৰহ কৰি নিজৰ প্ৰথম ইনিংছ ঘোষণা কৰিছিল।
মেচখনত মুঠ ৯টা উইকেট লাভ কৰা ঈশান্ত শৰ্মাক প্ৰদান কৰা হয় মেন অৱ দা মেচ।
উল্লেখ্য যে বিৰাট কোহলী নেতৃত্বাধীন ভাৰতীয় দলে একেৰাহে তিনিটা টেষ্ট শৃংখলাত ক্লিন ছুইপ অৰ্জন কৰে। তদুপৰি একেৰাহে চাৰিখন টেষ্ট মেচ ইনিংছ ব্যৱধানত জয়ী হোৱাৰো ৰেকৰ্ড গঢ়ে ভাৰতে।
ভাৰতে ইয়াৰ পূৰ্বে ৱেষ্ট ইণ্ডিজক ২-০ আৰু দক্ষিণ আফ্ৰিকাক ৩-০ ত পৰাভূত কৰিছে।
