২০১৪ চনত নৰেন্দ্ৰ মোদীক প্ৰধান মন্ত্ৰী পদৰ প্ৰাৰ্থী হিচাপে ঘোষণা কৰাৰ পাছত দেশত ভাৰতীয় জনতা পাৰ্টিৰ বিকাশ দ্ৰুত গতিত হৈছিল।
বিজেপিয়ে ২০১৪ চনত কেন্দ্ৰত শাসনলৈ অহাৰ পাছত বহু কেইখন ৰাজ্যত বিজেপিৰ চৰকাৰ গঠন হয়।
২০১৭ চনত সমগ্ৰ ভাৰতৰ ৭১ শতাংশ অংশ বিজেপিৰ দখললৈ আহে। এয়া প্ৰধান মন্ত্ৰী নৰেন্দ্ৰ মোদী আৰু অমিত শ্বাহৰ ৰাজনৈতিক বিচক্ষণতাৰ ফল বুলি বহুতে উল্লেখ কৰিবলৈ লয়।
আনহাতে, ডিচেম্বৰৰ পাছত বিজেপিৰ ছন্দ পতন আৰম্ভ হয় আৰু ২০১৯ চনৰ নৱেম্বৰলৈ বিজেপিৰ অংশীদাৰিত্ব ৭১ শতাংশৰ পৰা হ্ৰাস পাই ৪০ শতাংশ হয়।
এক প্ৰতিবেদন অনুসৰি দেশত ২০১৭ চনৰ তুলনাত ২০১৯ত মোদী-শ্বাহ যুটিৰ চমক হ্ৰাস পায়।
২০১৯ লোকসভা নিৰ্বাচনৰ পূৰ্বে বিজেপিৰ নিজৰ দখলত থকা ৰাজস্থান, মধ্যপ্ৰদেশ আৰু ছত্তীশগড় বিধানসভা নিৰ্বাচনত পৰাস্ত হয় আৰু লোকসভা নিৰ্বাচনৰ পাছত অনুষ্ঠিত হোৱা মহাৰাষ্ট্ৰ নিৰ্বাচনত শিৱসেনাৰ লগত মতানৈক্য ঘটি বিজেপিয়ে শাসন হেৰুৱাব লগীয়া হয়।
বিজেপিয়ে হাৰিয়ানাত জেজেপিৰ সৈতে লগ হৈ কোনোমতে চৰকাৰ গঠন কৰিবলৈ সক্ষম হয় যদিও ভবা মতে সফলতা লাভত ব্যৰ্থ হয়।
এতিয়া বিজেপিৰ শেহতীয়া লক্ষ্য হৈছে আহিবলগীয়া দিল্লীৰ নিৰ্বাচন। দিল্লীৰ নিৰ্বাচনে মোদী-শ্বাহ যুটিৰ ভবিষ্যত নিৰ্ভৰ কৰিব।
