সদাব্যস্ত শিৱসাগৰৰ নগৰৰ মাজমজিয়াত আজি সংঘটিত এক দিন ডকাইটিৰ ঘটনাই নগৰখনত তীব্ৰ চাঞ্চল্যৰ সৃষ্টি কৰিছে।
নগৰখনৰ আলিউদ্দিন আহমেদ নামৰ ৬০ উদ্ধৰ এজন ব্যক্তিয়ে কানাড়া বেংকৰ পৰা দুই লক্ষাধিক টকা উলিয়াই স্কুটিৰে আহি থকা অৱস্থাত এ এচ টি চি তিনিআলিৰ সমীপতে বাইকত অহা দুজন যুৱকে ব্যক্তিজনৰ স্কুটিৰ পৰা টকাৰ বেগটো থপিয়াই নিয়ে।
অকস্মাৎ সংঘটিত এই ঘটনাত আলিউদ্দিন আহমেদ স্কুটিসহ ৰাস্তাত বাগৰি পৰে।
প্ৰত্যক্ষদৰ্শীৰ মতে যুৱক দুজন পালচাৰ বাইকত ব্যক্তিজনৰ পিছে পিছে আহিছিল আৰু বেগটো থপিয়াই তীব্ৰ গতিত এ টি ৰোড হৈ পলায়ন কৰে।
আহমেদে শিৱসাগৰৰ এটা ট্ৰেভেল এজেঞ্চিত কাম কৰে আৰু টকাখিনি বেংকৰ পৰা উলিয়াই কাৰ্যলয়লৈ আহি থকা সময়ত ঘটনাটো সংঘটিত হয়।
শিৱসাগৰ আৰক্ষীয়ে বাতৰি লিখা সময়লৈকে দূৰ্বৃত্তক কৰায়ক্ত কৰিবলৈ সক্ষম হোৱা নাই। আনহাতে ইয়াৰ পূৰ্বেও শিৱসাগৰ নগৰত বাইকত অহা চিলনী চোৰে কেইবাটাও চুৰি কাৰ্য্য সংঘটিত কৰিছে যদিও চিলনী চোৰ ধৰাত সম্পূৰ্ণ ব্যৰ্থ শিৱসাগৰ আৰক্ষী।
