ভাৰত আৰু বাংলাদেশৰ মাজত ক্ৰিকেট শৃংখলা সমাপ্ত হোৱাৰ পাছত বাংলাদেশৰ ক্ৰিকেটাৰ সকল স্বদেশলৈ উভতি গলেও দলটোৰ ৰিজাৰ্ভ অপেনাৰ সইফ হাচান ভাৰতত অনুমতি বিহীনভাৱে থকাৰ বাবে জৰিমনাৰ সন্মুখীন হ’বলগীয়া হয়।
ভিছাৰ ম্যাদ উকলি যোৱাৰ পাছতো ভাৰতত থকা বাবে বাংলাদেশী ক্ৰিকেটাৰ গৰাকীয়ে শাস্তিৰ সন্মুখীন হ’বলগীয়া হয়।
ভাৰতৰ বিৰুদ্ধে টেষ্ট শৃংখলাত বাংলাদেশ দলত স্থান লাভ কৰিছিল সইফে। দলত স্থান লাভ কৰিলেও মূল একাদশত খেলিবলৈ তেওঁ সুযোগ লাভ কৰা নাছিল।
কলকাতাৰ পিংক বল টেষ্ট ম্যেচৰ পাছতে বাংলাদেশী ক্ৰিকেটাৰ সকলে স্বদেশলৈ উভতি যায়।
বাংলাদেশী ক্ৰিকেটাৰ লিটন দাসো ভাৰতত কিছুদিনৰ বাবে আছিল। দাসে দক্ষিণেশ্বৰ কালী মন্দিৰত পূজাও আগবঢ়ায়।
উল্লেখযোগ্য যে, পিংক বল টেষ্ট ম্যেচ সমাপ্ত হোৱাৰ পাছতে সোমবাৰে বাংলাদেশী ক্ৰিকেটাৰ সকল স্বদেশলৈ যাত্ৰা কৰে।
বাংলাদেশী দলটোৰ অন্য খেলুৱৈ সকলৰ সৈতে সইফো আছিল। কিন্তু বিমান বন্দৰত আৰক্ষীয়ে সইফৰ ভিছা পৰীক্ষা কৰাৰ সময়ত তেওঁৰ ভিছাৰ ম্যাদ দুদিন আগতে উকলি যোৱা বুলি জানিবলৈ পাৰে।
প্ৰকৃততে সইফৰ ভিছা বাংলাদেশ ক্ৰিকেট বোৰ্ডে পৃথককৈ কৰিছিল যাৰ বাবে এনে হয় বুলি জানিব পৰা গৈছে।
অৱশেষত অনুমতি অবিহনে অতিৰিক্ত সময়ৰ বাবে ভাৰতত থকা অপৰাধত সইফে ২১ হাজাৰ ৬০০ টকা জৰিমনা আদায় দিবলগীয়া হয়।
জৰিমনা আদায় দি সইফ দেশলৈ উভতি গলেও এই ঘটনাই এতিয়াও বাংলাদেশ ক্ৰিকেট বোৰ্ড যে সম্পূৰ্ণ পেছাদাৰী হৈ উঠা নাই সেয়া প্ৰমান কৰিছে।
