বিদায়ী আৰক্ষী সঞ্চালক প্ৰধান কুলধৰ শইকীয়াৰ ঠাইত ভাৰপ্ৰাপ্ত আৰক্ষী সঞ্চালক প্ৰধান (acting DGP) হিচাপে ভাস্কৰজ্যোতি মহন্তক নিযুক্তি দিয়া হৈছে, ৰাজ্য চৰকাৰৰ গৃহ বিভাগে জাৰি কৰা এখন জাননীত এই কথা কোৱা হৈছে।
বৰ্তমানৰ সঞ্চালক প্ৰধান কুলধৰ শইকীয়াৰ কাৰ্য্যকাল কাইলৈ অন্ত পৰিব।
দায়িত্বপ্ৰাপ্ত মহন্ত ১৯৮৮ (আৰ আৰ) বেচ্চৰ আই পি এছ বিষয়া আৰু তেওঁ বৰ্তমান অসম আৰক্ষীৰ বিশেষ সঞ্চালক প্ৰধান (সীমান্ত) হিচাপে কাৰ্য্যনিৰ্বাহ কৰি আছে।
অসম আৰক্ষীৰ শীৰ্ষ সূত্ৰই জনোৱা মতে, অসম চৰকাৰে নতুন সঞ্চালক প্ৰধান হিচাপে চাৰিজন বিষয়াৰ নামৰ এখন তালিকা কেন্দ্ৰীয় লোকসেৱা আয়োগৰ অনুমোদনৰ বাবে প্ৰেৰণ কৰিছে।
তালিকাখনত ভাস্কৰজ্যোতি মহন্তৰ উপৰি স্থান লাভ কৰিছে এ কে সিনহা কাশ্যপ, মুকেশ আগৰৱালা আৰু বি কে মিশ্ৰ। ইয়াৰে এজনৰ নাম চূড়ান্ত হৈ তেওঁ কাৰ্য্যভাৰ নোলোৱা পৰ্য্যন্ত মহন্তই দায়িত্ব পালন কৰি যাব।
আন এটা সূত্ৰৰ মতে, চোৰাংচোৱা বিষয়া তপন কুমাৰ ডেকাৰ নাম নতুন আৰক্ষী সঞ্চালক প্ৰধান হিচাপে চৰ্চাত আছিল যদিও সেয়া কিছু কাৰিকৰী অসুবিধাৰ বাবে শেষত বাদ দিয়া হয়।
ইপিনে বি কে মিশ্ৰৰ অৱসৰৰ বাবে মাত্ৰ তিনি মাহ মানহে সময় আছে বাবে তেওঁৰ নাম বিবেচিত হোৱাৰ সম্ভাৱনাও কম।
সূত্ৰটোৰ দাবী, ভাস্কৰজ্যোতি মহন্তৰ নামেই নতুন সঞ্চালক প্ৰধান হিচাপে বিবেচিত হোৱাৰ সম্ভাৱনা বেছি।
