উত্তৰ-পূবৰ ষষ্ঠ অনুসূচীৰ অন্তৰ্গত অঞ্চলসমূহ তথা ইনাৰ লাইন পাৰ্মিট ব্যৱস্থা থকা ৰাজ্যসমূহক নাগৰিকত্ব সংশোধনী বিধেয়ক (CAB)ৰ পৰিসৰৰ পৰা বাহিৰত ৰখাৰ সম্ভাৱনা আছে।
গৃহ মন্ত্ৰী অমিত শ্বাহে আজি তেওঁৰ বাসগৃহত অনুষ্ঠিত বৈঠকত বিভিন্ন ৰাজনৈতিক দল তথা ছাত্ৰ, আঞ্চলিক সংগঠনৰ প্ৰতিনিধিবৰ্গৰ আগত এনে এক ইংগিত দিয়ে।
এক বিশ্বস্ত সূত্ৰৰ পৰা জানিব পৰা মতে শ্বাহে বৈঠকত ভাগ লোৱা প্ৰতিনিধিবৰ্গক কয় যে বিধেয়কখন অনাৰ সময়ত উত্তৰ-পূবৰ ৰাইজৰ স্বাৰ্থক ধ্যানত ৰখা হ’ব।
এই প্ৰসংগত মন্ত্ৰী হিমন্ত বিশ্ব শৰ্মাই কয়, ‘ষষ্ঠ অনুসূচীৰ অন্তৰ্গত অঞ্চল আৰু ইনাৰ লাইন পাৰ্মিট থকা ৰাজ্যসমূহত CAB প্ৰযোজ্য নহয়।‘
আজিৰ বৈঠকত ভাগ লোৱা সকলো প্ৰতিনিধিয়েই গৃহ মন্ত্ৰী গৰাকীৰ বক্তব্যত সন্তুষ্টি প্ৰকাশ কৰা বুলিও মন্ত্ৰী শৰ্মাই দাবী কৰে।
উল্লেখযোগ্য যে উত্তৰ-পূবৰ অসম, মেঘালয়, ত্ৰিপুৰা আৰু মিজোৰামৰ ১০খন স্বায়ত্তশাসিত জিলা পৰিষদ ষষ্ঠ অনুসূচীৰ অধীনত পৰে, আনহাতে ইনাৰ লাইন পাৰ্মিট মিজোৰাম, অৰুণাচল প্ৰদেশ তথা ছিকিমৰ কিছুমান অঞ্চলত প্ৰযোজ্য।
আনহাতে অসম চুক্তিৰ ৬নং দফাৰ পৰ্যালোচনাৰ বাবে গঠিত কমিটিখনে তেওঁলোকৰ প্ৰতিবেদন দাখিল কৰাৰ পিছতে উক্ত দফা কাৰ্যকৰী কৰা হ’ব বুলিও শ্বাহে আজিৰ বৈঠকত আশ্বাস দিয়ে বুলি জানিব পৰা গৈছে।
কংগ্ৰেছৰ ফালৰ পৰা মেঘালয়ৰ প্ৰাক্তন মুখ্য মন্ত্ৰী মুকুল চাংমা আৰু অৰুণাচল প্ৰদেশৰ প্ৰাক্তন মুখ্য মন্ত্ৰী নাবাম টুকিয়ে বৈঠকত ভাগ লৈ নাগৰিকত্ব বিধেয়কৰ বিৰুদ্ধে নিজৰ স্থিতি ৰাখে।
‘বিধেয়কখনে এক বিশৃংখল পৰিস্থিতিৰ সৃষ্টি কৰাৰ লগতে উত্তৰ-পূবৰ খিলঞ্জীয়া জনসাধাৰণৰ মাজত এক শংকাৰ ভাব আনিব‘ মুকুল চাংমাই কয়।
ইফালে বৈঠকৰ পিছত সাংবাদিকৰ আগত অগপৰ সভাপতি অতুল বৰাই বৰ্তমান এই সম্পৰ্কত কোনো স্পষ্ট বক্তব্য প্ৰকাশ নকৰি বিধেয়কখনৰ ড্ৰাফত কি আছে সেইখিনি চাইহে মন্তব্য দিব বুলি কয়।
