হায়দৰাবাদৰ পশু চিকিৎসক যুৱতীক দলবদ্ধ ধৰ্ষণ কৰি হত্যা কৰা ঘটনাৰ প্ৰতিবাদত ইতিমধ্যে উত্তাল হৈ পৰিছে সমগ্ৰ দেশ।
সোমবাৰে সংসদতো সকলো ৰাজনৈতিক দলে এই ঘটনাৰ প্ৰতিবাদত সৰৱ হৈ পৰে। কিছুমানে আনকি গণ প্ৰহাৰ কৰি ফাঁচীত ওলোমোৱাৰ পৰামৰ্শও দিয়ে।
এনে সময়তে ৰাজস্থানৰ দুটা ধৰ্ষণৰ ঘটনাই সকলোৰে চকু কপালত তুলিছে। ৰাজ্যখনৰ জালোৰ আৰু টংক জিলাত সংঘটিত ধৰ্ষণৰ ঘটনা দুটাৰ পাছত মানৱতা জীয়াই আছেনে তাকলৈয়েই প্ৰশ্ন উত্থাপিত হৈছে।
জালোৰ আৰক্ষীয়ে সদৰী কৰা অনুসৰি সাত বছৰ পূৰ্বে ১৭ বছৰীয়া এগৰাকী কিশোৰীৰ মাতৃ ঘৰ এৰি গুচি যায়। ইয়াৰ কিছুদিন পাছতে পৰিয়ালৰ আন মহিলাৰ সৈতে পিতৃক অসংযত অৱস্থাত প্ৰত্যক্ষ কৰে ছোৱালীজনীয়ে।
ইয়াৰ পাছতে ছোৱালীজনীৰ ওপৰত আৰম্ভ হয় নিৰ্যাতন। ঘৰত হাত-ভৰিত বান্ধি চেইনেৰে বান্ধি ৰাখি প্ৰতিদিনে অভিযুক্ত ব্যক্তিজনে ধৰ্ষণ কৰে।
যোৱা শুকুৰবাৰে সুযোগ বুজি ছোৱালীজনী মোমায়েকৰ ঘৰলৈ যায় আৰু সকলো বিৱৰি কয়। ইয়াৰ পাছতে ছোৱালীজনীৰ মোমায়েক আৰক্ষীৰ দ্বাৰস্থ হয়।
অভিযোগ দাখিল হোৱাৰ পাছৰে পৰা অভিযুক্ত পলাতক হৈ আছে আৰু আৰক্ষীয়ে অপৰাধীৰ সন্ধানত তালাচী অব্যাহত ৰাখিছে।
আনহাতে, টংক জিলাৰ খেতাদি গাঁৱত এজনী ছয় বছৰীয়া স্কুলীয়া ছাত্ৰীক বৰ্বৰভাৱে ধৰ্ষণ কৰি হত্যা কৰা হৈছে। নাবালিকা ছাত্ৰীগৰাকীক ধৰ্ষণৰ পাছত ধৰ্ষণকাৰীয়ে তাইৰ স্কুলৰ পোছাকৰ বেল্টেৰে ডিঙিত ফাঁচ লগাই হত্যা কৰে।
দেওবাৰে টংকৰ খেতাদি গাঁৱৰ এক নিৰ্জন অঞ্চলত ঝাৰণিৰ মাজৰ পৰা নাবালিকাগৰাকীৰ মৃতদেহ উদ্ধাৰ কৰা হয়।
ঘটনাস্থলীৰ পৰা আৰক্ষীয়ে মদৰ বটল আৰু খোৱাবস্তুৰ পেকেট উদ্ধাৰ কৰে। আৰক্ষীয়ে তাত তেজৰ ডোঙা দেখিবলৈ পায়। স্থানীয় লোকে ঘটনাস্থলীত আৰক্ষীৰ বিৰুদ্ধে প্ৰতিবাদ সাৱ্যস্ত কৰে।
আৰক্ষীয়ে জানিবলৈ দিয়া মতে শনিবাৰে নাবালিকাগৰাকীয়ে স্কুলত ক্ৰীড়া প্ৰতিযোগিতাত খেলা-ধূলাও কৰিছিল। কিন্তু তাৰ কিছুসময়ৰ পাছৰে পৰা তাই নিখোজ হৈ পৰিছিল।
দুপৰীয়া তিনি বজালৈকে তাই ঘৰলৈ নহাত তাইৰ পৰিয়ালৰ লোকে চাৰিওপিনে বিচাৰ-খোচাৰ কৰে। অৱশেষত দেওবাৰে ৰাতিপুৱা স্কুলৰ পৰা আধা কিলোমিটাৰমান দূৰত এখন ঝাৰণিৰ আঁৰত তাইৰ ৰক্তাক্ত মৃতদেহ উদ্ধাৰ হয়।
আৰক্ষী তথা ফৰেনছিকৰ লোক ঘটনাস্থলীত উপস্থিত হৈ তদন্ত আৰম্ভ কৰে। টংকৰ আৰক্ষী অধীক্ষকগৰাকীয়ে জানিবলৈ দিয়ে যে শীঘ্ৰেই অপৰাধীক কৰায়ত্ত কৰা হ’ব। তদন্তৰ বাবে আৰক্ষীয়ে কেইবাটাও দল সাজু কৰিছে।
হায়দৰাবাদৰ ঘটনাই দেশবাসীক উদ্বিগ্ন কৰি ৰখাৰ সময়তে ৰাজস্থানৰ এনে পৈশাচিক ঘটনা দুটাই দেশৰ সচেতন লোকসকলক বাৰুকৈয়ে অস্থিৰ কৰি তুলিছে।