কটন বিশ্ববিদ্যালয়, ডিব্ৰুগড় বিশ্ববিদ্যালয়ৰ পাছত এইবাৰ নাগৰিকত্ব সংশোধনী বিধেয়কৰ বিৰুদ্ধে ৰাজপথলৈ ওলাই আহিল ভট্টদেৱ বিশ্ববিদ্যালয়ৰ ছাত্ৰ-ছাত্ৰী।
পাঠশালা অঞ্চলিক ছাত্ৰ সন্থাৰ উদ্যোগত বিশ্ববিদ্যালয়ৰ বহু ছাত্ৰ-ছাত্ৰীয়ে কেবৰ বিৰুদ্ধে মঙলবাৰে তীব্ৰ প্ৰতিবাদ সাব্যস্ত কৰে।
প্ৰতিবাদকাৰী সকলে বিভিন্ন শ্লোগানেৰে বিশ্ববিদ্যালয়ৰ সন্মুখভাগৰ পথছোৱা উত্তাল কৰি তোলাৰ লগতে বিজেপি নেতৃত্বাধীন কেন্দ্ৰীয় চৰকাৰক কেব বাতিল কৰিবলৈ দাবী জনায়।
ইফালে কেবৰ পক্ষত অৱস্থান লোৱা অসম গণ পৰিষদৰ তিনি মন্ত্ৰীৰ লগতে বৰ্তমান চৰকাৰৰ মন্ত্ৰীসকলক বিশ্ববিদ্যালয়খনত প্ৰৱেশ কৰিবলৈ দিয়া নহ’ব বুলি পাঠশালা অঞ্চলিক ছাত্ৰ সন্থাৰ উপ-সভাপতি চিন্ময় লহকৰৰ লগতে ছাত্ৰ সমাজে জানিবলৈ দিয়ে।
প্ৰতিবাদকাৰীয়ে কোনো কাৰণতে জাতিধ্বংসী বিধেয়কখন মানি নলয় বুলিও মন্তব্য কৰে।
আনহাতে ভট্টদেৱ বিশ্ববিদ্যালয় ছাত্ৰ একতা সভাৰ সাধাৰণ সম্পাদক অৰ্ণৱ বৰ্মনে এই বিধেয়কখনৰ বিৰোধিতা কৰি ইয়াক কোনো ছাত্ৰ-ছাত্ৰীয়ে গ্ৰহণ নকৰে বুলি স্পষ্টভাৱে জনায়।
প্ৰতিবাদকাৰীসকলে মুখ্য মন্ত্ৰী সৰ্বানন্দ সোণোৱাল, চৰকাৰৰ বিৰুদ্ধে বিভিন্ন শ্লোগান দিয়াৰ লগতে প্ৰধান মন্ত্ৰী নৰেন্দ্ৰ মোদী আৰু সোণোৱালৰ প্ৰতিকৃতিও দাহ কৰে।
