অসমীয়া জাতি-ভাষা-সংস্কৃতিক নিঃশেষ কৰিব পৰা নাগৰিকত্ব সংশোধনী বিধেয়কৰ পক্ষত অৱস্থান গ্ৰহণ কৰা অগপৰ সভাপতি অতুল বৰাৰ বিৰুদ্ধে জাঙুৰ খাই উঠিছে দলটোৰ একাংশ জিলা নেতৃত্বৰ লগতে তৃণমূল পৰ্যায়ৰ বহু নেতা-কৰ্মী।
অসম আন্দোলনৰ ফলশ্ৰুতিত সম্পাদিত অসম চুক্তিক গীতা, কোৰাণ, বাইবেল আখ্যা দিয়া অতুল বৰাই এতিয়া একমাত্ৰ মন্ত্ৰিত্বৰ লালসা তথা ক্ষমতাৰ খকত বিজেপিক দিয়া সমৰ্থন সহজভাৱে মানি ল’ব পৰা নাই তেজপুৰৰ নেতা-কৰ্মী।
প্ৰাক্তন সভাপতি তথা বৰ্তমানৰ তেজপুৰৰ বিধায়ক বৃন্দাবন গোস্বামীৰ নেতৃত্বত তেজপুৰ অগপৰ নেতা-কৰ্মীসকলে অতুল বৰাৰ বিৰুদ্ধে বিদ্ৰোহ ঘোষণা কৰি কেব কোনো পধ্যে গ্ৰহণ কৰা নহ’ব বুলি বুধবাৰে স্পষ্ট কৰি দিয়ে।
তেজপুৰ জিলা অগপ কাৰ্যালয়ত আয়োজিত হোৱা এখন সভাত অসম ৰাজ্যিক মহিলা পৰিষদৰ উপ-সভানেত্ৰী তৰুলতা দাসে সভাপতি অতুল বৰাৰ মন্তব্য আৰু অসম চুক্তিক অৱমাননা কৰা কোনো কাৰ্যক মানি লোৱা নহ’ব বুলি মন্তব্য কৰে।
ইয়াৰ উপৰি কেবৰ বিৰুদ্ধে তেজপুৰৰ অগপই সদায় মাত মাতি আহিছে আৰু সদায় প্ৰতিবাদ কৰি যাব বুলিও মহিলা নেত্ৰীগৰাকীয়ে কয়।
আনহাতে তেজপুৰ যুৱ পৰিষদৰ সভাপতি দাদুল বৰায়ো দলৰ সভাপতি অতুল বৰাৰ মন্তব্য গ্ৰহণযোগ্য নহয় বুলি স্পষ্টভাৱে কোৱাৰ লগতে কেব বিৰোধী শ্লোগানেৰে তেজপুৰৰ কাৰ্যালয়ৰ পৰিৱেশ উত্তাল কৰি তোলে।
ইফালে সংবিধান বিৰোধী নাগৰিকত্ব সংশোধনী বিধেয়কৰ পক্ষ লোৱা অগপৰ তিনি মন্ত্ৰীৰ এনে কাৰ্যত ক্ষুন্ন হৈ পৰিছে প্ৰাক্তন মন্ত্ৰী তথা অগপৰ জ্যেষ্ঠ নেতা গিৰীন্দ্ৰ কুমাৰ বৰুৱা। অতুল বৰাৰ মন্তব্যক অতিশয় দুৰ্ভাজ্যনক আখ্য্যা দিছে বৰুৱাই।
লগতে পঢ়ক : অতুল বৰাৰ কেব সমৰ্থন ব্যক্তিগত
অসম চুক্তিৰ ৬নং দফা অনুসৰি খিলঞ্জীয়াৰ স্বাৰ্থ সুৰক্ষিত কৰিব লগা বিষয়সমূহ নিশ্চিত নোহোৱাকৈ কেন্দ্ৰীয় চৰকাৰে কেব আনি অসমবাসীক পুনৰ এবাৰ প্ৰতাৰণা কৰিব বিচাৰিছে। এইক্ষেত্ৰত অগপ দলে সবল ভূমিকা লোৱাটো প্ৰয়োজন আছিল।
অসম গণ পৰিষদৰ প্ৰতিষ্ঠাপক নেতা প্ৰফুল্ল কুমাৰ মহন্তয়ো দলৰ সভাপতি অতুল বৰাৰ কেব সমৰ্থন ব্যক্তিগত বুলি মন্তব্য কৰি সভাপতিগৰাকীক সমালোচনা কৰে।
“অতুল বৰাৰ বক্তব্যই আমাৰ দলৰ সিদ্ধান্ত প্ৰতিফলিত নকৰে,” বুলি মহন্তই মন্তব্য কৰিছিল। কেব বাতিল নোহোৱালৈকে তেওঁ বিৰোধিতা কৰি যাব বুলিও কৈছে।
