ৰাজধানী দিল্লীৰ ৰাণী ঝান্সি ৰোডত দেওবাৰে পাচলিৰ বজাৰত এক ভয়াবহ অগ্নিকাণ্ড সংঘটিত হৈছে। ঘটনাৰ পাছতে অঞ্চলটোত তীব্ৰ আতংকময় পৰিস্থিতিৰ সৃষ্টি হৈছে।
ইতিমধ্যে অগ্নিনিৰ্বাপক বাহিনীৰ গাড়ীৰে জুই নিৰ্বাপিত কৰাৰ প্ৰচেষ্টা অব্যাহত ৰাখিছে বাহিনীৰ কৰ্মীসকলে।
এই ভয়ংকৰ অগ্নিকাণ্ডত ৩২জন লোকৰ মৃত্যু ঘটিছে আৰু বহুলোক গুৰুতৰভাৱে আহত হৈছে। সুৰক্ষা বাহিনীৰ লগতে স্থানীয় লোকে উদ্ধাৰ অভিযান অব্যাহত ৰাখিছে।
জানিব পৰা মতে, পাচলিৰ বজাৰত থকা অট্টালিকাত অগ্নিকাণ্ড সংঘটিত হৈছে। অগ্নিকাণ্ডটো ইমানেই ভয়ংকৰ যে প্ৰায় ৩০খন অগ্নি নিৰ্বাপক বাহিনীৰ গাড়ীয়ে জুই নুমুৱাবলৈ প্ৰচেষ্টা অব্যাহত ৰাখিছে।
ঘটনাৰ পাছতে আহত লোকসকলক হাস্পাতললৈ প্ৰেৰণ কৰা হয়। হাস্পাতলৰ ফালৰ পৰা ৩২জন লোকৰ মৃত্যু হোৱাৰ কথা ঘোষণা কৰা হৈছে।
অগ্নিকাণ্ডটোত এতিয়ালৈকে প্ৰায় ৫৬জন লোকক উদ্ধাৰ কৰা হৈছে। ইয়াৰে বহুতেই গুৰুতৰভাৱে আহত হৈছে।
আহতসকলক চাৰিখন বেলেগ বেলেগ হাস্পাতললৈ প্ৰেৰণ কৰা হৈছে। আহতসকলক আৰ এম এল, এল এন জি পি, হিন্দু ৰাও আৰু ছফদৰজং হাস্পাতলত ভৰ্তি কৰা হৈছে।
পুৱা ৫ বজাতে অগ্নিকাণ্ডৰ ঘটনাটো সংঘটিত হোৱা বুলি জানিব পৰা গৈছে। বজাৰখনত থকা এটা তিনিমহলীয়া অট্টালিকাত থকা বেকাৰীৰ ওপৰৰ মহলাত অগ্নিকাণ্ডটো সংঘটিত হয়।
ইয়াৰ পাছতে জুই গোটেই অট্টালিকাটোতে বিয়পি পৰে।
