‘‘সংগ্ৰামৰ দ্বাৰাহে কৃতকাৰ্যতা লাভ কৰিব পাৰি আৰু জীৱনত সফল হ’ব লাগিলে কঠোৰ পৰিশ্ৰমৰ কোনো বিকল্প নাই,’’ মুখ্য মন্ত্ৰী সৰ্বানন্দ সোণোৱালৰ মন্তব্য।
আজি অসম প্ৰশাসনীয় পদাধিকাৰী মহাবিদ্যালয়ত ২০১৯-২০ বৰ্ষৰ চাহ জনজাতি সম্প্ৰদায়ৰ অসামৰিক সেৱাৰ পৰীক্ষাত অৱতীৰ্ণ হ’বলগীয়া প্ৰাৰ্থীসকলৰ প্ৰাক পৰীক্ষা প্ৰশিক্ষণ কাৰ্য্যসূচী শুভাৰম্ভ কৰি মুখ্য মন্ত্ৰী সৰ্বানন্দ সোণোৱালে এইদৰে কয়।
উল্লেখযোগ্য যে, ৰাজ্য চৰকাৰৰ চাহ জনজাতি কল্যাণ বিভাগৰ দ্বাৰা এই প্ৰশিক্ষণ ক্ৰমাগতভাৱে তৃতীয় বৰ্ষৰ বাবে অনুষ্ঠিত কৰা হৈছে।
৬ মাহৰ প্ৰশিক্ষণ কাৰ্য্যসূচীৰ বাবে মুঠ ২১০ গৰাকী আবেদনকাৰীৰ ভিতৰত ৫০ গৰাকী প্ৰাৰ্থীক এই প্ৰশিক্ষণৰ বাবে নিৰ্বাচিত কৰা হৈছে।
ভাষণ প্ৰসংগত মুখ্য মন্ত্ৰী সোণোৱালে কয় যে আজিৰ যুগটো হ’ল তীব্ৰ প্ৰতিযোগিতাৰ যুগ। সেয়েহে এই প্ৰতিযোগিতাত অৱতীৰ্ণ হ’ব লাগিলে কঠোৰ পৰিশ্ৰম, অধ্যাৱসায় আৰু একাণপতীয়া প্ৰচেষ্টাৰ প্ৰয়োজন।
চাহ জনজাতি হ’ল এক পৰিশ্ৰমী সম্প্ৰদায়, সেয়েহে এই প্ৰতিযোগিতাৰ যুগত এই জনগোষ্ঠীটোৱে আগবাঢ়ি যোৱাৰ পূৰ্ণ সম্ভাৱনীয়তা আছে বুলি উল্লেখ কৰি সোণোৱালে এই প্ৰশিক্ষণৰ বাবে নিৰ্বাচিত হোৱা ছাত্ৰ-ছাত্ৰীসকলে তেওঁলোকৰ যোগ্যতা অনুযায়ী উৎকৃষ্ট ফলাফল লাভ কৰিবলৈ সক্ষম হ’ব বুলিও মুখ্য মন্ত্ৰীয়ে আশা প্ৰকাশ কৰে।
বৰ্তমান সময় চাহ জনগোষ্ঠী সকলৰ বাবে গুৰুত্বপূৰ্ণ বুলি উল্লেখ কৰি মুখ্য মন্ত্ৰীয়ে কয় যে তেওঁলোকে পূৰ্বতে সন্মুখীন হোৱা অৱজ্ঞাৰ যোগ্য প্ৰত্যুত্তৰ দিয়াৰ বাবে শৈক্ষিক দিশত সৰ্বাধিক গুৰুত্ব আৰোপ কৰিব লাগিব বুলিও মুখ্য মন্ত্ৰীয়ে কয়।
আজিৰ অনুষ্ঠানত বিধায়ক তেৰচ গোৱালা, চাহ জনজাতি কল্যাণ বিভাগৰ প্ৰধান সচিৱ ড০ জে বি এক্কাইও ভাষণ প্ৰদান কৰে।
