নাগৰিকত্ব সংশোধনী বিধেয়ক বাতিলৰ দাবীত সমগ্ৰ অসমৰ লগতে যোৰহাট জিলাৰ টীয়কৰ বিভিন্ন অঞ্চল প্ৰতিবাদমুখৰ হৈ পৰিছে।
অসম প্ৰেমী যুৱ ছাত্ৰ সমাজৰ উদ্যোগত আজি সন্ধিয়াৰ পৰা টীয়কৰ কলিয়াপানীত অৰ্থনৈতিক অৱৰোধ আৰম্ভ হৈছে।
অসম প্ৰেমী যুৱ ছাত্ৰ সমাজৰ প্ৰায় দুশ গৰাকী প্ৰতিবাদকাৰী লগ হৈ উজনিৰ পৰা বহিঃৰাজলৈ খনিজ সম্পদ, বনজ সম্পদ কঢ়িয়াই নিয়া ট্ৰাক সমূহৰ চলাচল বন্ধ কৰি অৰ্থনৈতিক অৱৰোধ আৰম্ভ কৰিছে।
উল্লেখযোগ্য যে, নাগৰিকত্ব সংশোধনী বিধেয়ক বাতিলৰ দাবীত সমগ্ৰ টীয়কত জনসাধাৰণক সজাগ কৰাৰ ক্ষেত্ৰত গুৰুত্বপূৰ্ণ পদক্ষেপ গ্ৰহণ কৰিছে অসম প্ৰেমী যুৱ ছাত্ৰ সমাজৰ টীয়ক আঞ্চলিক সমিতিয়ে।
অসম প্ৰেমী যুৱ ছাত্ৰ সমাজৰ মহা সচিৱ অৰিন্দম সদিয়াখোৱাই জানিবলৈ দিছে যে, ভাৰত ৰাষ্ট্ৰই অসমৰ খনিজ সম্পদ সমূহ বাহিৰলৈ নিয়া কেতিয়াও মানি লোৱা নহ’ব।
নাগৰিকত্ব সংশোধনী বিধেয়ক বাতিল নকৰা পৰ্যন্ত অৰ্থনৈতিক অৱৰোধ প্ৰত্যাহাৰ কৰা নহয় বুলিও সংগঠনটোৰ উপদেষ্টা মনোজ গগৈয়ে মত প্ৰকাশ কৰে।
