নাগৰিকত্ব (সংশোধনী) আইনৰ প্ৰতিবাদত গুৱাহাটীৰ লক্ষীধৰ বৰা ক্ষেত্ৰত আজি ২২ ডিচেম্বৰত অসম সমাজৰ উদ্যোগত অনুষ্ঠিত মৌন অৱস্থান কাৰ্য্যসূচীত অংশগ্ৰহণ কৰে ৰাজ্যৰ বৌদ্ধিক মহলে।
অনিমা গুহ, হীৰেণ গোহাঁই, হোমেন বৰগোহাঞি, লক্ষ্মীনন্দ বৰা, দিলীপ হাজৰিকা, হৰেকৃষ্ণ ডেকা, প্ৰদীপ বৰুৱা, ননী বৰপূজাৰী, দীনেশ চন্দ্ৰ গোস্বামী, ৰত্ন ওজা, সমুজ্জ্বল কুমাৰ ভট্টাচাৰ্য্যকে কেইবাগৰাকী বিশিষ্ট ব্যক্তিয়ে অংশগ্ৰহণ কৰে।
সভাত শান্তিপূৰ্ণ, অহিংস প্ৰতিবাদীৰ ওপৰত দমন নিপীড়ন বন্ধ কৰা, অখিল গগৈ আৰু অন্যান্য সকলক শীঘ্ৰে বিনাচৰ্তে মুক্তি দিয়া, আন্দোলনত চহিদ হোৱা সকলৰ মৃত্যুৰ ন্যায়িক তদন্ত আৰু ক্ষতিপূৰণৰ দাবী তোলা হয়।
বিশিষ্ট বুদ্ধিজীৱী হীৰেণ গোহাঁইয়ে ‘মৌন’ প্ৰতিবাদস্থলীত আৰক্ষী মোটায়েন কৰাক লৈ উদ্বিগ্নতা প্ৰকাশ কৰি কয়, ‘আজি এয়া মৌন অৱস্থান হোৱা স্বত্তেও ইয়াৰ প্ৰতি এনেকুৱা ভাবুকি দিয়াটো আচৰিত কথা। এই ৰাষ্ট্ৰৰ কথা চিন্তা কৰিব লাগিব যি ৰাষ্ট্ৰই আমাক চেপি খুন্দি এই অৱস্থাত পেলাইছে।‘
‘কা’ বিৰোধী আন্দোলনত অসম অকলশৰীয়া নহয় বুলি উল্লেখ কৰি ড০ গোহাঁইয়ে কয় ‘আমি অকলশৰীয়া নহয়, ভাৰতৰ কেওফালে ‘কা’ ৰ বিৰুদ্ধে প্ৰতিবাদ হ’বলৈ ধৰিছে।‘
আনহাতে, এই মৌন অৱস্থানত অংশগ্ৰহণ কৰি আছুৰ উপদেষ্টা সমুজ্জ্বল ভট্টাচাৰ্য্যই সংবাদ মাধ্যমৰ আগত অখিল গগৈ আৰু অন্যান্যসকলক মুকলি কৰি দিবলৈ আহ্বান জনায়।
ভট্টাচাৰ্য্যই কয়, ‘অখিল গগৈ আৰু তেওঁৰ সতীৰ্থসকলক চৰকাৰে গ্ৰেপ্তাৰ কৰাটো অতিকৈ গৰিহণাযোগ্য। অখিল গগৈক নিৰ্য্যাতন চলাই হাত বান্ধি আদালতলৈ লৈ অনা হৈছে। এই নিৰ্যাতন বন্ধ কৰক। অখিল গগৈসহ সকলো সহযোগীক শীঘ্ৰে মুক্তি দিয়ক।‘
ইপিনে, কালি ৰাজ্য চৰকাৰে ঘোষণা কৰা আঁচনিক ললিপপ আখ্যা দি প্ৰাক্তন আৰক্ষী সঞ্চালক প্ৰধান হৰেকৃষ্ণ ডেকাই কয় ‘চৰকাৰৰ এইবোৰ ললিপপ। চৰকাৰে এয়া ভোলাইছে। চৰকাৰৰ ভোলুকনিত যদি ভোল যায় তেন্তে ৰাইজে ভুল কৰা হ’ব। চৰকাৰে আগতেও ভোলুকনি দিছিল। এইবাৰ আশা কৰিছো চৰকাৰৰ ভোলুকনিত ৰাইজ ভোল নাযায়।‘
কাৰ্য্যসূচীত অংশগ্ৰহণ কৰি ৰত্ন ওজাই কয় ‘সকলোতকৈ টান পাইছো চৰকাৰখনে নিজৰ মানুহকে ঠগিব খুজিছে। এয়া ক্ষমতাৰ লোভ। আই বন্দী হৈ থাকোতে মোৰ দৰে শিল্পী সাহিত্যিকক কিবা খাবলৈ দিব আহিছে, এইটো আচৰিত কথা।
প্ৰদীপ বৰুৱাই এই কয়, ‘চৰকাৰক আমি কুটুম বুলি ভাবিছিলো, তেওঁলোকক গ্ৰহণ কৰিছিলো। কিন্তু এনেকৈ স্খলন হ’ব বুলি ভবা নাছিলো।কোনো বেয়া বস্তু ৰাইজে গ্ৰহণ নকৰে।‘
‘যেন আমাৰ যুঁজ এখন আহি আছে, জীয়াই থকাৰ যুঁজ। জাতিৰ এই সন্ধিক্ষণত এনেকুৱা এটা কথা আহিছে যে আমাক পঙ্গু কৰিব খোজা হৈছে। আমি সদায় সংবিধানত বিশ্বাস কৰো। সংবিধান বিৰোধী প্ৰচেষ্টা চলিছে তাৰ আমি বিৰোধিতা কৰিছো।‘ দিলীপ হাজৰিকাই কয়।
