ৰেইল যাত্ৰা বৰ্তমান সময়তো যথেষ্ট পীড়াদায়ক হিচাপেই পৰিগণিত হৈ আহিছে। আপুনি যেতিয়াই ৰেইলত যাত্ৰা কৰিব বিচাৰে কনফাৰ্ম টিকট পোৱাটো এক ডাঙৰ প্ৰত্যহ্বান হৈ ধৰা দিয়ে।
কিন্তু শীঘ্ৰেই কনফাৰ্ম টিকট পোৱাটো সহজ হৈ পৰিব। ভাৰতীয় ৰেইলৱেই আগন্তুক পাঁচ বছৰত এনে ব্যৱস্থা কৰিবলৈ গৈ আছে যে যেতিয়াই আপুনি টিকট কাটিব কনফাৰ্ম ছীটহে পাব। অৰ্থাৎ নাথাকিব কোনো অপেক্ষা তালিকা (No Waiting list)।
ৰেইলৱে বোৰ্ডৰ অধ্যক্ষ বিনোদ যাদবে এক ৰাষ্ট্ৰীয় সংবাদ মাধ্যমৰ আগত কয় যে বিগত কেইবছৰ ধৰি কনফাৰ্ম টিকট পোৱাৰ সমস্যাৰ সন্দৰ্ভত চিন্তা-চৰ্চা চলোৱা হৈছে।
তেওঁ কয় যে তৎকাল সেৱাৰ জৰিয়তে কনফাৰ্ম টিকটৰ সমস্যা কিছু পৰিমানে হ্ৰাস কৰিবলৈ সক্ষম হৈছে যদিও এতিয়াও বহুক্ষেত্ৰত ই এক সমস্যা হৈয়েই আছে। ৰেইলৱেই আগন্তুক পাঁচ বছৰত কনফাৰ্ম টিকট দিয়াটো বাস্তৱায়িত কৰি তুলিব।
বিনোদ যাদবে লগতে কয় যে আটাইতকৈ ব্যস্ত পথত এই আঁচনিৰ শুভাৰম্ভ কৰা হ’ব।
ৰেইলেৱ কৰ্তৃপক্ষৰ পৰা জানিব পৰা মতে কনফাৰ্ম টিকটৰ শুভাৰম্ভণি দিল্লীৰ পৰা মুম্বাই, কলকাতা আৰু চেন্নাই পথত কৰা হ’ব। ৰেইলৱেই এই পথসমূহত অধিক ৰেইলৰ চলাচল কৰোৱাই কনফাৰ্ম টিকট দিয়াটো সম্ভৱ কৰি তুলিব পাৰে।
উল্লেখযোগ্য যে অতি ব্যস্ত পথ দিল্লী-মুম্বাই, দিল্লী-কলকাতা, দিল্লী-চেন্নাইত ৰেইলৰ টিকট সহজতে পোৱা নাযায়। ইয়াৰ বাবে বেছিভাগ যাত্ৰীয়েই ৰেইলৰ পৰিৱৰ্তে বিমানেৰে যাত্ৰা কৰিবলৈ বিচাৰে। ফলত ৰেইলৱেৰ ৰাজহ ঘাটি হৈছে।
চৰকাৰৰ এই নতুন সিদ্ধান্তৰ জৰিয়তে যাত্ৰীসকল উপকৃত হোৱাৰ আশা কৰা হৈছে।
