নাগৰিকত্ব সংশোধনী বিধেয়কৰ সপক্ষে ক’বলৈ গৈ যোৱা ১১ ডিচেম্বৰত ৰাজ্যসভাৰ মজিয়াত অসমৰ মাজুলীৰ বিষয়ে বিকৃত তথ্যৰে মহাৰাষ্টৰ বিজেপিৰ সাংসদ ভি পি সহস্রবুদ্ধেই দিয়া মন্তব্য কাৰ্য্যক্ৰমণিকাৰ পৰা মচি পেলাবলৈ অনুৰোধ জনাইছে দেৱব্ৰত শইকীয়াই।
ৰাজ্যৰ বিৰোধী দলৰ দলপতিজনে ৰাজ্যসভাৰ অধ্যক্ষলৈ প্ৰেৰণ কৰা পত্ৰখনত সাংসদজনক অসম আৰু বিশেষভাৱে মাজুলীৰ লোকৰ ওচৰত তেওঁৰ ভুল তথ্যৰ বাবে ক্ষমা খুজিবলৈ নিৰ্দেশ দিবলৈও কয়।
১১ ডিচেম্বৰত সহস্রবুদ্ধেই ৰাজ্যসভাত অসমৰ পৰিস্থিতিৰ বিষয়ে ক’বলৈ গৈ কাজিৰঙা আৰু মাজুলীৰ বিষয়ত মন্তব্য কৰিছিল।
অসমৰ মানুহে মিচিং সংস্কৃতি আৰু সত্ৰীয়া সংস্কৃতিৰ পীঠস্থান জ্ঞান কৰা “মাজুলীত থলুৱা মানুহ নাই, বিদেশীৰে ভৰি আছে” বুলি বিজেপিৰ সাংসদজনে উদাত্ত ভাষণত উল্লেখ কৰিছিল। বিজেপিৰ সাংসদজনৰ ভাষণত প্ৰচুৰ হাত চাপৰি দিছিল দলৰ আন আন সাংসদসকলে।
সহস্ৰবুদ্ধেৰ এই মন্তব্যৰ পিছতে অসমত যথেষ্ট প্ৰতিক্ৰিয়া হৈছিল। মাজুলীৰ সত্ৰাধিকাৰ, নাগৰিক সমাজকে ধৰি বিভিন্নজনে আৰু দল-সংগঠনে ইয়াৰ বিৰুদ্ধে প্ৰতিবাদ সাব্যস্ত কৰে।
“এইটো হ’ল সত্যৰ অপলাপ। প্ৰকৃত কথাটো হ’ল মাজুলী কেইবা শতিকা ধৰি অসমৰ বৈষ্ণৱ সংস্কৃতিৰ পীঠস্থান হিচাপে চিহ্নিত হৈ আছে। ইয়াত ২২খন সত্ৰ বা বৈষ্ণৱ ধৰ্মৰ পীঠ আছে, যিবোৰে ঘৰুৱা আৰু বিদেশৰ পৰ্য্যটককো আকৰ্ষিত কৰি আহিছে”, দেৱব্ৰত শইকীয়াই পত্ৰখনত এইদৰে লিখা বুলি জানিব পৰা গৈছে।
শইকীয়াই এই কথাও পত্ৰখনত জনাইছে যে মাজুলীৰ মুঠ ১.৬৭ লাখ জনসংখ্যাৰ ভিতৰত ৪৬.৪ শতাংশ হ’ল খিলঞ্জীয়া জনজাতীয় লোক আৰু এই কাৰণেই তাৰ পৰা মুখ্য মন্ত্ৰী সৰ্বানন্দ সোণোৱাল বিধায়ক নিৰ্বাচিত হ’ব পাৰিলে।
আনহাতে ২০১১ চনৰ লোকপিয়ল মতে, মাজুলীৰ জনসংখ্যাৰ ৯৯.০৪ শতাংশ হিন্দু। তেনেস্থলত হিন্দুৰ ৰক্ষাকৰ্তাৰ ভূমিকাত অৱতীৰ্ণ হোৱা এজন সাংসদে মাজুলীৰ মানুহৰ বিষয়ে এনে মন্তব্য কৰাটো দুৰ্ভাগ্যজনক বুলি উল্লেখ কৰিছে শইকীয়াই।
আনহাতে এনে ভুল মন্তব্য উঠাই লৈ মাজুলীবাসীৰ ওচৰত ক্ষমা বিচাৰিবৰ বাবে সাংসদগৰাকীক পোন্ধৰ দিনৰ চূড়ান্ত সময় বান্ধি দিছে মাজুলীৰ সত্ৰাধিকাৰসকলে। ক্ষমা নুখুজিলে আদালতৰ কাষ চাপিবলৈ বাধ্য থাকিব বুলিও এখন পত্র যোগে জনাই দিছে স্বাক্ষৰকাৰী সত্রাধিকাৰসকলে৷
স্বাক্ষৰকাৰী সত্রাধিকাৰসকলৰ ভিতৰত আছে দক্ষিণপাট আশ্রমী সত্রৰ সত্রাধিকাৰ জনার্দন দেৱ গোস্বামী, আধাৰ সত্রৰ সত্রাধিকাৰ মহেশ চন্দ্র গোস্বামী, গডমূৰ বৰ সত্রৰ অধিকাৰ পৰমানন্দ দেৱ গোস্বামী, বেলসিদ্ধিয়া সত্রৰ অধিকাৰ নন্দ দুলাল গোস্বামী আদি।
