‘পৃথিৱীৰ সকলো সভ্যতা নদীৰ পাৰতে গঢ় লৈ উঠা। সেয়ে আই নদীৰ পাৰত অনুষ্ঠিত দৈজিং উৎসৱ মহা মিলনৰ উৎসৱ হিচাপে পৰিগণিত হৈছে। আগন্তুক দিনত এই উৎসৱ বিশ্ব পৰ্যটনৰ উৎসৱ হিচাপে গঢ়ি তুলিবলৈ মিলিত প্ৰচেষ্টা ল’ব লাগিব’। এই মন্তব্য অসমৰ মুখ্য মন্ত্ৰী সৰ্বানন্দ সোণোৱালৰ।
চিৰাং জিলাৰ আই নদীৰ পাৰৰ হাগ্ৰামা দলঙৰ কাষত অনুষ্ঠিত চতুৰ্থ দৈজিং উৎসৱত অংশ লোৱা মুখ্য মন্ত্ৰী সোণোৱালে বি টি এ ডি অঞ্চল এতিয়া শান্তিৰ জৰিয়তে দ্ৰুত প্ৰগতিৰ দিশত আগুৱাই যোৱা বুলিও ভাষণ প্ৰসংগত উল্লেখ কৰে।
মুখ্য মন্ত্ৰীয়ে ব্ৰহ্মপুত্ৰ নদীৰ এখন শক্তিশালী উপনৈ আই নদীৰ পাৰত অনুষ্ঠিত হোৱা এই উৎসৱে ভৱিষ্যতে আৰু অধিক দেশী-বিদেশী পৰ্যটকক আকৰ্ষিত কৰিব পাৰিব বুলিও কয়।
ইয়াৰ উপৰি নদী সমূহে বহন কৰা জল সম্পদৰ সম্ভাৱনীয়তাক যদি উপযুক্তভাৱে কামত খটুওৱা হয় তেন্তে অসম বিশ্বৰ বুকুতে এখন শক্তিশালী ৰাজ্য হিচাপে পৰিগণিত হ’ব বুলিও উল্লেখ কৰে।
ভাষণ প্ৰসংগত মুখ্য মন্ত্ৰীয়ে বিটিচি অঞ্চলত শান্তি-সম্প্ৰীতি বাতাবৰণ অব্যাহত ৰাখি দৈজিং উৎসৱ সফলতাৰে অনুষ্ঠিত কৰাৰ বাবে বিটিচি প্ৰধান হাগ্ৰামা মহিলাৰীকে ধৰি এই উৎসৱৰ লগত জড়িত সকলোকে ধন্যবাদ জনায়।
আজিৰ এই অনুষ্ঠানত আদৰণি ভাষণ প্ৰদান কৰা বিটিচি উপ-প্ৰধান খাম্পা বৰগয়াৰীৰ উপৰি পৰ্যটন মন্ত্ৰী চন্দন ব্ৰহ্ম, অসম বিধানসভাৰ প্ৰাক্তন অধ্যক্ষ তথা হাউছফেডৰ অধ্যক্ষ ৰঞ্জিত কুমাৰ দাসৰ লগতে কেইবাজনো বিধায়ক তথা শীৰ্ষ বিষয়া উপস্থিত থাকে।
