মঙলদৈ চহৰত দেওবাৰে গধূলি অহা এজাক শিল বৰষুণে শীতৰ প্ৰকোপ বৃদ্ধি কৰে আৰু নাগৰিকসকলক ঘৰৰ ভিতৰতে আৱদ্ধ থাকিবলৈ বাধ্য কৰে।
সন্ধিয়া প্ৰায় ৭-৩৫ বজাত আৰম্ভ হোৱা শিলাবৃষ্টি ৩০ মিনিটতকৈয়ো অধিক সময় অব্যাহত থাকে।
বৰষুণৰ লগত পৰা শিলসমূহ সৰুৰ পৰা মজলীয়া আকাৰৰ আছিল আৰু সন্ধিয়াৰ ব্যস্ত বজাৰলৈ অহা একাংশ লোকৰ লগতে বাহনসমূহতো এই শিলাবৰ্ষণে আঘাত কৰে।
অৱশ্যে ইয়াৰ ফলত কোনো জীৱন তথা সম্পত্তিৰ ক্ষতি হোৱাৰ বাতৰি পোৱা হোৱা নাই।
সম্ভাৱ্য কোনো দুৰ্ঘটনা এৰাই চলিবৰ বাবে তাৎক্ষণিকভাৱে বিদ্যুৎ সংযোগ বিছিন্ন কৰি দিয়া হয় আৰু গোটেই চহৰখন অন্ধকাৰত নিমজ্জিত হৈ পৰে।
অৱশ্যে, পাছত বিদ্যুৎ সংযোগ পুনৰ দিয়া হয়।
শিল-বৰষুণ জাকৰ পাছতে অভূতপূৰ্বভাৱে বৃদ্ধি পোৱা শীতৰ প্ৰকোপত স্বাভাৱিক জীৱন যাত্ৰা ব্যাহত হৈ পৰে।
চহৰখনৰ লোকসকল ঘৰৰ ভিতৰত সোমাই পৰে আৰু ৰুম হিটাৰ লগাই বা জুই জ্বলাই উত্তাপ লোৱাৰ চেষ্টা কৰে।
তদুপৰি, মজলীয়া আকাৰৰ শিলৰ লগতে প্ৰবল বৰষুণৰ ফলত ৰবি শস্যৰ খেতি পথাৰ তথা শাক-পাচলিৰ বিস্তৰ ক্ষতিসাধন হয় যাৰ ফলত খেতিয়কসকলে মূৰে-কপালে হাত দিবলগীয়া হৈছে।
