“ৰাক্ষস শিশু” এটিয়ে অসমত জন্ম লোৱা বুলি বিয়পি পৰা খবৰ মিছা।
যোৱা জুলাইত প্ৰথম চৰ্চা লাভ কৰা “ৰাক্ষস শিশু”ৰ বাতৰিটো Altnews নামৰ বাতৰিৰ সত্যতা অনুসন্ধানকাৰী সংবাদ সংস্থাটোৱে ভুৱা বুলি প্ৰমাণ কৰিছে।
চ’চিয়েল মিডিয়াত চলা ৰাক্ষস শিশুৰ খবৰটোত দাবী কৰা হৈছিল যে তাৰ জন্মৰ লগে লগে মাকৰ মৃত্যু ঘটিছে আৰু সন্তানটি জন্ম দিয়াত সহায় কৰা নাৰ্ছগৰাকীৰো তিনি ঘণ্টাৰ ভিতৰত প্ৰাণহানি হৈছে।
কিন্তু, “ৰাক্ষস” নৱজাতকটিৰ জন্ম ক’ত হৈছে বা মাক-বাপেক কোন আদি একো তথ্য চ’চিয়েল মিডিয়াত উৰি ফুৰা বাতৰিটোত নাছিল।
এতিয়া Altnewsৰ বিতং অনুসন্ধানত প্ৰকাশ যে শিশুটি আচলতে “Harlequin Ichthyosis” নামৰ এক খুব দুৰ্লভ ৰোগত আক্ৰান্ত।
“ত্ৰুটীপূৰ্ণ জীনৰ বাবে এক নিযুতৰ মাজত এগৰাকী লোক এই ৰোগত আক্ৰান্ত হয়। ই ছাল গঠন প্ৰক্ৰিয়াৰ গতিত প্ৰভাৱ পেলায়, অৰ্থাৎ পুৰণি শুকান ছাল খহাত অধিক সময় লয় বা নতুন ছাল অধিক দ্ৰুতগতিত সৃষ্টি হয়। ফলত ডাঠ ছালৰ তৰপ এটাৰ সৃষ্টি হয়,” Altnewsৰ বাতৰিত প্ৰকাশ।
অনলাইন মিডিয়া গোটটোৰমতে, এনে ঘটনা অসমতে ঘটিব বুলি কথা নাই, ভাৰতৰ আন ঠাইতো এনে শিশুৱে জন্ম লোৱাৰ উদাহৰণ আছে।
“২০১৬ চনৰ জুনত মহাৰাষ্ট্ৰৰ বিদৰ্ভত এটা খেতিয়ক দম্পতীয়ে এনে এটি শিশুৰ জন্ম দিছিল। দুদিনৰ পিছত শিশুটিৰ মৃত্যু হোৱা বুলি প্ৰকাশ,” তেওঁলোকে কয়।
বিহাৰৰ পাটনা আৰু নতুন দিল্লীত ক্ৰমে ২০১৭ আৰু ২০১৯ চনত এনে শিশুৰ জন্মৰ বাতৰি প্ৰকাশিত হৈছে।
এই ৰোগৰ কোনো নিৰাময় নাই, কিন্তু নৱজাতকৰ উন্নত যতনৰ জৰিয়তে শিশুক বচাৰ সম্ভাৱনা বৃদ্ধি কৰিব পৰা যায়।
