বিশ্বৰ ক্ষুদ্ৰতম পুৰুষ খগেন্দ্ৰ থাপা মগৰ আৰু নাই। কিছুদিন ধৰি নিউমোনিয়া ৰোগত আক্ৰান্ত হৈ নেপালৰ এখন চিকিৎসালয়ত ভৰ্তি হৈ থকা খগেন্দ্ৰৰ শুকুৰবাৰে দেহাৱসান ঘটে।
মৃত্যুৰ সময়ত খগেন্দ্ৰ থাপা মগৰৰ বয়স আছিল ২৭ বছৰ। গিনিজ ৱৰ্ল্ড ৰেকৰ্ডছত নাম অন্তৰ্ভুক্ত কৰা বিশ্বৰ ক্ষুদ্ৰতম ব্যক্তিজনৰ মৃত্যুত তেওঁৰ গুণমুগ্ধসকল শোকাভিভুত হৈ পৰিছে।
নেপালৰ পোখৰাৰ নাগৰিক খগেন্দ্ৰ থাপা মগৰৰ উচ্চতা আছিল ৬৭.০৮ ছেন্টিমিটাৰ বা ২ ফুট ২.৪১ ইঞ্চি।
খগেন্দ্ৰৰ পিতৃ-মাতৃৰ বাদে নিজৰ বুলিবলৈ আন কোনো নাছিল। নিজৰ ১৮ বছৰীয়া জন্মদিন উদযাপনৰ পাছতেই ২০১০ চনত গিনিজ ৱৰ্ল্ড ৰেকৰ্ডছত নাম অন্তৰ্ভুক্ত হৈছিল তেওঁৰ।
বিশ্বৰ ক্ষুদ্ৰতম পুৰুষ হিচাপে খগেন্দ্ৰই কেইবাখনো দেশ ভ্ৰমণ কৰিছিল। নেপাল পৰ্যটনৰো পৰিচিত মুখ আছিল থাপা।
য়ুৰোপ আৰু আমেৰিকাৰ কেইবাটাও চেনেলত সাক্ষাৎকাৰ প্ৰকাশ পাইছিল খগেন্দ্ৰ। গিনিজ ৱৰ্ল্ড ৰেকৰ্ডছৰ ভিডিঅ’ত খগেন্দ্ৰই তেওঁৰ ভাতৃৰ সৈতে গীটাৰ বজোৱা, বাইকত উঠোৱা আদি দেখা গৈছিল।
অতি কম বয়সতে ইহলীলা সম্বৰণ কৰিলে বিশ্বৰ এই ক্ষুদ্ৰতম ব্যক্তিগৰাকীয়ে। সংবাদ প্ৰতিষ্ঠানক তেওঁৰ ভাতৃ মহেশ থাপা মগৰে দিয়া সাক্ষাৎকাৰত কৈছে যে খগেন্দ্ৰ বেছিভাগ সময়েই নিউমোনিয়াত ভগিছিল যাৰ বাবে বাৰে বাৰে তেওঁক হাস্পাতলত ভৰ্তি কৰিবলগীয়া হৈছিল।
এইবাৰ চিকিৎসকে জানিব দিয়া মতে খগেন্দ্ৰৰ হৃদযন্ত্ৰ কাম নকৰা হৈছিল আৰু ফলত তেওঁৰ মৃত্যু হয়।
