সৰ্বানন্দ সোণোৱাল নেতৃত্বাধীন ৰাজ্য চৰকাৰৰ কেইবাটাও গুৰুত্বপূৰ্ণ দপ্তৰৰ আজি সাল-সলনি হয়। কিছু সংখ্যকৰ হাতৰ পৰা বিভাগীয় মন্ত্ৰীত্বৰ দায়িত্ব যোৱাৰ বিপৰীতে আন কিছুসংখ্যকৰ বৃদ্ধি পাইছে দায়িত্ব।
ৰাজ্যৰ এক বিয়াগোম বিভাগ ‘শিক্ষা বিভাগ’ৰ দায়িত্বৰ পৰা অব্যাহতি দিয়া হ’ল মন্ত্ৰী সিদ্ধাৰ্থ ভট্টাচাৰ্য্যক। বিপৰীতে ৰিহন দৈমাৰীৰ হাতত থকা সমবায় বিভাগৰ দায়িত্ব দিয়া হৈছে মন্ত্ৰী সিদ্ধাৰ্থ ভট্টাচাৰ্য্যক।
অৱশ্যে ভট্টাচাৰ্য্যৰ হাতত বৰ্তমানো গুৱাহাটী উন্নয়নৰ দপ্তৰ বাহাল আছে।
মন্ত্ৰী ভট্টাচাৰ্য্যৰ সলনি পুনৰবাৰ ৰাজ্যৰ শিক্ষা বিভাগৰ দায়িত্ব দিয়া হৈছে দক্ষ মন্ত্ৰী হিমন্ত বিশ্ব শৰ্মাক।
ভৱেশ কলিতাক দিয়া হৈছে ৰাজ্যিক শিক্ষা মন্ত্ৰীৰ দায়িত্ব। তেওঁৰ হাতৰ পৰা ৰাজহ বিভাগৰ দায়িত্ব কৰ্তন হৈছে।
ইপিনে, নতুনকৈ মন্ত্ৰিত্ব লাভ কৰা যোগেন মহনক দিয়া হৈছে ৰাজহ বিভাগৰ দায়িত্ব। ইয়াৰ লগতে শক্তি আৰু গড়কপ্তানি বিভাগৰ ৰাজ্যিক মন্ত্ৰীৰ দায়িত্বও লাভ কৰিছে মহনে।
তদুপৰি, শ্ৰম আৰু চাহ জনগোষ্ঠীয় উন্নয়ন বিভাগৰ মন্ত্ৰিত্ব দিয়া হৈছে নতুনকৈ মন্ত্ৰিত্ব লাভ কৰা সঞ্জয় কিষাণক।
ইপিনে ৰাজ্যিক মন্ত্ৰী পিযুষ হাজৰিকাৰ দায়িত্ব বৃদ্ধি কৰি ৰাজ্যিক স্বাস্থ্য মন্ত্ৰীৰ লগতে নগৰ আৰু প্ৰয় প্ৰণালী দপ্তৰৰ দায়িত্বও দিয়া হৈছে।
তাৎপয্যপূৰ্ণভাৱে, সোণোৱাল মন্ত্ৰীসভাৰ ৰদবদল হ’ল যদিও বহুকেইগৰাকী জ্যেষ্ঠ বিজেপি নেতৃত্ব এই তালিকাৰ পৰা বাদ পৰিল। বঞ্চিত হৈ ৰ’ল বিজেপিৰ জ্যেষ্ঠ নেতা তথা ডিব্ৰুগড় সমষ্টিৰ পৰা তিনিবাৰকৈ বিধায়ক হিচাপে নিৰ্বাচিত হোৱা প্ৰশান্ত ফুকন।
তাৰোপৰি বিধায়ক পদ্ম হাজৰিকা, অতুল বৰা, ৰমাকান্ত দেউৰী, তেৰছ গোৱালা, দিলীপ পাল, মানছিং ৰংপী, শিলাদিত্য দেৱকে ধৰি বহু কেইগৰাকী মন্ত্ৰিত্বৰ বাবে প্ৰত্যাশী আছিল যদিও বাদ পৰি ৰ’ল।
