মহাৰাষ্ট্ৰৰ পুনে মহানগৰত PUBG খেলি এজন যুৱক মৃত্যুক সাবটিবলগীয়া এক ঘটনা সংঘটিত হৈছে। নিহত যুৱকজনক হৰ্ষল মেমান বুলি চিনাক্ত কৰা হৈছে।
জানিব পৰা মতে যোৱা ১৮ জানুৱাৰীত PUBG খেলি থকা অৱস্থাত যুৱকজনৰ ব্ৰেইন ষ্ট্ৰ’ক আহে। তেওঁক তৎক্ষণাৎ ওচৰৰ এখন হস্পিতালত ভৰ্তি কৰোৱা হয় যদিও প্ৰচুৰ মাত্ৰাত মগজুৰ ৰক্তক্ষৰণৰ ফলত তেওঁ মৃত্যু আকোৱালি লয়।
মেমানৰ মৰণোত্তৰ পৰীক্ষাৰ প্ৰতিবেদনৰ উল্লেখ কৰি এখন স্থানীয় আৰক্ষী থানাৰ সূত্ৰই জনাই যে PUBG খেলি থাকোতে অতিমাত্ৰা উত্তেজিত হৈ উঠাৰ ফলতে হয়তো তেওঁৰ ষ্ট্ৰ’ক আহিল।
উল্লেখযোগ্য যে যথেষ্ট জনপ্ৰিয় হৈ পৰা PUBGৰ ফলত ঘটা এইটোৱে প্ৰথমটো এনেধৰণৰ মাৰাত্মক ঘটনা নহয়। বিশেষকৈ মোবাইলত PUBG খেলিব পৰা হোৱাৰে পৰা এই খেলবিধৰ প্ৰকোপ যথেষ্ট বৃদ্ধি পোৱাৰ লগতে কেইবাটাও বিষম ঘটনা ঘটিছে।
মেমানৰ মৃত্যুৰ ঘটনা একপ্ৰকাৰ বহুতৰে নিচাত পৰিণত হোৱা খেলবিধৰ কু-প্ৰভাৱৰ একেবাৰে শেহতীয়া উদাহৰণ। আনকি এনে কাৰণসমূহৰ বাবে গে’ম ডেভলপাৰ সকলে ‘এ’জ লক’, ‘টাইম ৰেষ্ট্ৰিকচন’ আদি কিছুমান নিয়ন্ত্ৰণমূলক ব্যৱস্থাও গ্ৰহণ কৰিবলৈ বাধ্য হৈছে।
