উচ্চতম ন্যায়ালয়ে CAA-ক লৈ অসম আৰু ত্ৰিপুৰা বিষয়ত আবেদনৰ শুনানি পৃথকভাৱে গ্ৰহণ কৰিব। আজি মুখ্য ন্যায়াধীশ ববডেৰ নেতৃত্বৰ এখন তিনিজনীয়া বিচাৰপীঠে CAA সম্পৰ্কীয় আবেদনৰ শুনানিত এই সিদ্ধান্ত লয়।
উচ্চতম ন্যায়ালয়ে কেন্দ্ৰীয় চৰকাৰক অসম-ত্ৰিপুৰা সম্বন্ধিত আবেদনৰ উত্তৰ দিবলৈ ২ সপ্তাহৰ সময় দিয়ে। ইয়াৰ পিছতে ৰাজ্য দুখনৰ আবেদনৰ শুনানি গ্ৰহণ কৰা হ’ব।
অসম আৰু ত্ৰিপুৰাক বাদ দি বাকি আবেদন সমূহৰ উত্তৰ দিয়াৰ বাবে ন্যায়ালয়ে কেন্দ্ৰীয় চৰকাৰক ৪ সপ্তাহৰ সময় দিছে।
লগতে পঢ়ক CAA-ৰ স্থগনাদেশ নিদিলে উচ্চতম ন্যায়ালয়ে; উত্তৰ দিয়াৰ বাবে কেন্দ্ৰীয় চৰকাৰক ৪ সপ্তাহৰ সময়
উল্লেখযোগ্য যে উচ্চতম ন্যায়ালয়ে CAA সম্পৰ্কত বিভিন্ন ৰাজ্যৰ উচ্চ ন্যায়ালয়ত হৈ থকা শুনানিত বাধা আৰোপ কৰিছে। উচ্চতম ন্যায়ালয়ত বিষয়টো নিষ্পত্তি নোহোৱালৈকে উচ্চ ন্যায়ালয়সমূহত এই সম্পৰ্কীয় কোনো শুনানি গ্ৰহণ কৰা নহ’ব।
আজি উচ্চতম ন্যায়ালয়ৰ তিনিজনীয়া বিচাৰপীঠে বিতৰ্কিত আইনখনৰ পক্ষে আৰু বিপক্ষে মুঠ ১৪৮টা পক্ষই দিয়া প্ৰায় ১৪৪খন আবেদনৰ শুনানি গ্ৰহণ কৰিছিল। এছ এ ববডেৰ নেতৃত্বত গঠিত বিচাৰপীঠখনত তেওঁৰ উপৰি ন্যায়াধীশ আব্দুল নাজিৰ আৰু ন্যায়াধীশ সঞ্জীৱ খান্নাও আছে।
