‘অসমীয়া ৰাইজে আত্মসমৰ্পণ নকৰে। ক্ষমতাৰ বাবে বলীয়ান হোৱা সকলেহে নিজক আত্মসমৰ্পণ কৰে’। এই মন্তব্য বিশিষ্ট সাংবাদিক অজিত কুমাৰ ভূঞাৰ।
নাগৰিকত্ব সংশোধনী আইন চমুকৈ ‘কা’ৰ বিৰোধিতাৰে আজি বৰপেটা জিলাৰ ভেল্লাত অনুষ্ঠিত বিশাল জনজাগৰণ সভাত অংশ লৈ তেওঁ কয় যে, বৰ্তমান ৰাজনৈতিক প্ৰেক্ষাপটত একাংশ ৰাজনৈতিক নেতাই ক্ষমতাৰ বাবে জাতি-মাটি-ভেটি বন্ধকত থবলৈও কুণ্ঠাবোধ কৰা নাই।
কিন্তু অসমৰ ৰাইজে ক্ষমতাৰ বাবে আত্মসমৰ্পণ নকৰে বুলি তেওঁ স্পষ্ট কৰি দিয়ে।
বিশাল সভাখনত অংশ গ্ৰহণ কৰি বিশিষ্ট সমাজকৰ্মী লাচিত বৰদলৈয়ে কয়, ‘মানুহ হত্যা কৰি ৰাজনীতি কৰা বাবে আমেৰিকাই নৰেন্দ্ৰ মোডীৰ ভিচা বন্ধ কৰি দিছিল।
সভাখনত বিশিষ্ট সাংবাদিক হাইদৰ হুছেইন, মনজিৎ মহন্তইও কেন্দ্ৰ আৰু ৰাজ্য চৰকাৰৰ বিৰুদ্ধে সোচ্চাৰ হৈ কা বাতিলৰ দাবী উত্থাপন কৰে।
শিল্পী সমাজৰ হৈ কণ্ঠশিল্পী বাবু, নেকিব, অজয় ফুকন আদিয়ে গীতৰ জৰিয়তে কা বাতিলৰ দাবী জনায়।
ভেল্লা উচ্চতৰ মাধ্যমিক বিদ্যালয়ৰ খেলপথাৰত অনুষ্ঠিত জনতাৰ জাগৰণ সভাখনত প্ৰাক্তন বিজেপি নেত্ৰী মীৰা বৰঠাকুৰ, অসম জাতীয়তাবাদী যুৱ ছাত্ৰ পৰিষদৰ উদয়ন কুমাৰ গগৈ, গৰিয়া মৰিয়া দেশী জাতীয় পৰিষদৰ আজিজুল ৰহমানেও ভাষণ প্ৰদান কৰে।
