বোকাখাতত মঙলবাৰে নিশা পহৰাদাৰী আৰক্ষী দলে ৩৭ নং ৰাষ্ট্ৰীয় ঘাইপথত এখন অবৈধ কাঠ ভৰ্তি ডি আই বাহন জব্দ কৰে।
আৰক্ষীৰ তথ্য মতে মনোজ ৰবিদাসৰ নামত পঞ্জীয়ন কৰা এ এছ-০৩বি চি ৫১৬৬ নম্বৰৰ গাড়ীখনে চোৰাং কাঠ সহ বোকাখাতৰ পৰা যোৰহাট অভিমুখে গৈ আছিল৷
চোৰাং কাঠখিনি সৰবৰাহ কৰি থকা অৱস্থাতে পহৰাদাৰী আৰক্ষীৰ দলটোৱে নিশা ৰাষ্ট্ৰীয় ঘাইপথত কৰায়ত্ব কৰে কাঠ ভৰ্তি বাহনখন৷
জব্দ হোৱা কাঠখিনি যোৰহাটৰ জনৈক প্ৰশান্ত দাসৰ বুলি জানিব পৰা গৈছে৷
যোৰহাট তৰাজানৰ নিৱাসী এই লোকজনে দীৰ্ঘ দিন পৰা বোকাখাত অঞ্চলৰ পৰা চোৰাং কাঠৰ ৰমৰমীয়া ব্যৱসায় চলায় আহিছে৷
নিশা গাড়ীৰে সৈতে জব্দ কৰা কাঠখিনি বুধবাৰে ৰাতিপুৱা বোকাখাত আৰক্ষীয়ে পুৱ অসম বন্যপ্ৰাণী সংমণ্ডলৰ হাতত অৰ্পন কৰে৷
মন কৰিবলগীয়া যে, বোকাখাতত আৰক্ষীয়ে বনজ সম্পদৰ চোৰাং কাৰবাৰ প্ৰতিৰোধৰ বাবে শক্তিশালী পদক্ষেপ হাতত লৈছে৷ যাৰ বাবে বহু চোৰাং কাঠ, কাঠফলা মিল আৰু সাঁচি কাঠো জব্দ কৰিবলৈ সক্ষম হৈছে আৰক্ষী৷
উল্লেখযোগ্য যে, একাংশ বিজেপি চৰকাৰৰ মিত্ৰ জোটৰ এটা ৰাজনৈতিক দলৰ নেতা তথা পালিনেতাই এই চোৰাং কাৰবাৰৰ পৃষ্ঠপোষকতা কৰি অহাৰ অভিযোগ উত্থাপন হৈছে।
অলপতে বোকাখাত আৰক্ষীয়ে কৰায়ত্ব কৰা সাঁচি কাঠ অনা ট্ৰেভেলাৰ গাড়ী আৰু লখৌজানৰ পৰা জব্দ কৰা কাঠ আৰু কাঠফলা মিলৰ সংক্ৰান্তত আৰক্ষী আৰু বন বিভাগক ৰাজনৈতিক দলটোৰ নেতাই প্ৰচণ্ড হেচা প্ৰয়োগ কৰা বলি জানিব পৰা গৈছে।
