চলিত বৰ্ষৰ এপ্ৰিল মাহত অনুষ্ঠিত হ’বলগীয়া বিটিচি নিৰ্বাচনত নৱ শৰণীয়াই বিপিএফক শূণ্য কৰাৰ লক্ষ্যৰে নিৰ্বাচনী প্ৰচাৰ চলাই থকাৰ মাজতে তেওঁ বিপিএফৰ কোনো ফেক্টৰ নহয় বা প্ৰত্যাহ্বান হিচাপে থিয় নিদিয়ে বুলি নৰ্থ ইষ্ট নাওৰ সাংবাদিকৰ আগত মন্তব্য কৰিছে ৰাজ্যসভাৰ বিপিএফ সাংসদ বিশ্বজিৎ দৈমাৰীয়ে।
আমাৰ সাংবাদিকে দৈমাৰীক বিটিচি নিৰ্বাচনত নৱ শৰণীয়া ফেক্টৰ হৈ পৰিব নেকি? বুলি সোধাত তেওঁ কয়, ‘নহয় চাওঁক, এই পৰিস্থিতি বিটিচিৰ মানুহে বুজি পালে যে তেওঁ যিখিনি কথা কৈছে সেইখিনিৰ বাস্তৱৰ লগত সম্পৰ্ক নাই।‘
তেওঁ আৰু কয়, ‘বড়ো শান্তি চুক্তিৰ জৰিয়তে যিবোৰ অপপ্ৰচাৰ বিটিচিবাসীৰ মাজত চলাই থকা হৈছিল সকলো নাইকিয়া হৈ গ’ল। সকলোৰে লাভম্বিত হ’ব পৰাকৈ কেন্দ্ৰীয় চৰকাৰ আৰু ৰাজ্য চৰকাৰৰ মাজত চুক্তি স্বাক্ষৰ হৈ গ’ল।‘
ইপিনে, ‘নৱ শৰণীয়াৰ হাতত প্ৰত্যাহ্বান হিচাপে থিয় দিব পৰা কোনো বিষয়েই নাই।‘ বুলি উল্লেখ কৰি দৈমাৰীয়ে কয়, ‘তেওঁৰ হাতত কি বিষয় আছে? তেওঁৰ হাতত কোনো ইচ্ছুৱেই নাই।‘
ইপিনে, আগন্তুক বিটিচি নিৰ্বাচন ভালেই হ’ব বুলি দাবী কৰি দৈমাৰীৰ মত ‘সকলোৱে মুকলিভাৱে নিৰ্বাচনত ভাগ ল’ব। আগতে এটা চিন্তা আছিল কৰবাত সন্ত্ৰাসবাদী সংগঠনে বিটিএডিত কিবা কৰিব নেকি? বিটিচিৰ বাসিন্দা হিচাপে সকলোৱে মুকলিকৈ অংশগ্ৰহণ কৰিব।‘
তাৎপয্যপূৰ্ণভাৱে, আজি অস্ত্ৰ সম্বৰণ কৰা NDFB নেতা-কেডাৰেও আগন্তুক বিটিএডি নিৰ্বাচনত অংশগ্ৰহণ কৰিব বুলি উল্লেখ কৰে দৈমাৰীয়ে।
দৈমাৰীয়ে কয়, ‘যিসকল নেতা কেডাৰে আত্ম সমৰ্পন কৰিলে তেওঁলোকৰ যাৰ বিৰুদ্ধে কোনো গোচৰ নাই বা নিৰ্বাচন আয়ুক্তই যদি গ্ৰহণ কৰে, তেন্তে তেওঁলোকে বিটিচি নিৰ্বাচনত প্ৰতিদ্বন্দিতা কৰিব। তেওঁলোকে যিহেতু আজি অস্ত্ৰ সম্বৰণ কৰিলে এতিয়া কোনো কথা নাই বা কোনো আণ্ডাৰগ্ৰাউণ্ড নহয়।‘
